Il-Ġimgħa 2 ta’ Ottubru

Il-Ġimgħa 2 ta’ Ottubru Tifkira tal-Anġli Kustodju

L-Ewwel Qari Baruk 1,15-22

Waqt l-eżilju tal-Babilonja, l-eżiljati talbu: 'Il-ġustizzja hi min-naħa tal-Mulej, Alla tagħna, iżda min-naħa tagħna, kif aħna llum, aħna għandna l-għajb ma' wiċċna, ma' wiċċ kull bniedem ta' Ġuda, u ma' wiċċ kull min joqgħod Ġerusalemm, ma' wiċċ is-slaten u l-prinċpijiet, u ma' wiċċ il-qassisin u l-profeti tagħna, u ma' wiċċ missirijietna. Għax aħna dnibna quddiem il-Mulej, ma tajniex widen għall-Mulej Alla tagħna, meta sejjħilna biex inġibu ruħna skond il-kmandamenti li tana l-Mulej, ma smajniex minnu." 'Sa minn meta l-Mulej ħareġ lil missirijietna mill-art ta' l-Eġittu sa llum, aħna qomna kontra l-Mulej Alla tagħna, ġibna ruħna bla ħsieb u ma smajniex il-leħen tiegħu. Għalhekk qabdu magħna l-hemm u s-saħta, li l-Mulej kien ħabbrilna permezz tal-qaddej tiegħu Mosè, meta ħareġ lil missirijietna mill-art ta' l-Eġittu, biex jagħtina art tnixxi ħalib u għasel; u hekk għadna sa llum. Ma smajniex leħen il-Mulej, Alla tagħna, f'kull ma qalilna permezz tal-profeti li bagħtilna, iżda kull wieħed minna mexa skond il-qalb ħażina tiegħu billi qdejna allat oħra u għamilna dak li hu ħażin quddiem il-Mulej, Alla tagħna.

Salm Responsorjali Salm 79, 1b-2; 3-5; 8; 9
F'ġieħ is-sebħ ta' l-isem tiegħek Mulej eħlisna

O Alla, daħlu l-ġnus f'wirtek, niġġsu t-tempju mqaddes tiegħek,
għamlu 'l Ġerusalemm ħerba waħda.
Taw l-iġsma tal-qaddejja tiegħek b'ikel lit-tjur ta' l-ajru;
taw laħam ħbiebek lill-bhejjem ta' l-art.
F'ġieħ is-sebħ ta' l-isem tiegħek Mulej eħlisna

Xerrdulhom demmhom bħal ilma madwar Ġerusalemm;
u ma kienx hemm min jidfinhom.
Waqajna għaċ-ċajt mal-ġirien tagħna,
għad-daħk u ż-żebliħ għal ta' madwarna.
Mulej, għal dejjem se tibqa' inkurlat magħna?
Se tibqa' mkebbsa bħan-nar il-ħeġġa tiegħek?
F'ġieħ is-sebħ ta' l-isem tiegħek Mulej eħlisna

Tiftakrilniex il-ħtijiet ta' l-imgħoddi; fittex ejja u lqagħna
bi ħnientek, għax ninsabu mifnija għall-aħħar.
F'ġieħ is-sebħ ta' l-isem tiegħek Mulej eħlisna

Għinna, o Alla, Salvatur tagħna, f'ġieħ is-sebħ ta' l-isem tiegħek;
eħlisna u aħfrilna dnubietna, minħabba l-isem tiegħek.
F'ġieħ is-sebħ ta' l-isem tiegħek Mulej eħlisna

Evanġelju Mattew 18, 1-5; 10

F'dak il-waqt resqu d-dixxipli lejn Ġesù u staqsewh: "Mela min hu l-akbar fis-Saltna tas-Smewwiet?" Hu sejjaħ lejh tfajjel ċkejken, qiegħdu f'nofshom u qalilhom,"Tassew ngħidilkom, li jekk intom ma terġgħux issiru bħat-tfal iż-żgħar, żgur li ma tidħlux fis-Saltna tas-Smewwiet. U għalhekk l-ikbar wieħed fis-Saltna tas-Smewwiet huwa dak li jċekken lilu nnifsu bħal dan it-tfajjel żgħir. U kull min jilqa' tfajjel bħal dan minħabba f'ismi, ikun jilqa' lili. "Araw li ma tonqsux mill-istima lejn xi wieħed minn dawn iż-żgħar; għax, ngħidilkom, l-anġli tagħhom fis-smewwiet dejjem jaraw wiċċ Missieri li hu fis-smewwiet.”