L-Erbgħa 30 ta’ Settembru

L-Erbgħa 30 ta’ Settembru L-Erbgħa tas-26 ġimgħa ta' matul is-sena

L-Ewwel Qari Neħemija 2,1-8

Fix-xahar ta' Nisan tas-sena għoxrin tas-saltna ta' Artasersi, is-sultan kellu l-inbid quddiemu, u jien ħadt l-inbid u newwilthulu. Qatt ma kont wiċċi mqarras quddiemu. U hu qalli: "Għaliex int wiċċek imqarras? Marid m'intix: għalhekk dan tiegħek m'huwiex ħlief swied il-qalb." Mbagħad jien bżajt ħafna; imma weġibt lis-sultan;"Sultan, jalla tgħix għal dejjem! Għax m'għandix inqarras wiċċi meta l-belt fejn hemm l-oqbra ta' missirijieti hi ħerba waħda u l-bibien tagħha maħruqa bin-nar?" Qalli mbagħad is-sultan: "X'inhu li qiegħed titlobni?" Jien tlabt lil Alla tas-smewwiet, u weġibt lis-sultan: "Jekk is-sultan jidhirlu li hi ħaġa sewwa u jekk il-qaddej tiegħek jogħġob lis-sultan, nixtieq li tibgħatni f'art Ġuda, fil-belt fejn hemm l-oqbra ta' missirijieti, ħalli nerġa' nibniha." Mbagħad, bis-sultana bilqiegħda maġenbu, is-sultan staqsieni: "Kemm iddum il-mawra tiegħek? Kemm iddum ma terġa' lura?" U meta jien tajtu ż-żmien, is-sultan għoġbu jibgħatni. Jien għalhekk għedt lis-sultan: "Jekk is-sultan jogħġbu, ħa jagħtini ittri għall-gvernaturi tan-naħa l-oħra ta' l-Ewfrat, biex iħalluni ngħaddi min naħa għall-oħra sa ma nasal f'art Ġuda. Ħa jagħtini wkoll ittra għal Asaf, li jieħu ħsieb il-foresti tas-sultan, biex jagħtini injam għat-travi fid-daħliet tal-fortizza li tħares it-tempju, tas-swar tal-belt, u tad-dar fejn se noqgħod."

Salm Responsorjali Ps 137:1-2, 3, 4-5, 6
Jeħilli lsieni mas-saqaf ta' ħalqi, jekk ma niftakarx fik

F'xatt ix-xmajjar ta' Babilonja, hemm qgħadna bilqiegħda
u bkejna, aħna u niftakru f'Sijon.
Mas-siġar tal-luq tagħha, dendilna ċ-ċetri tagħna.
Jeħilli lsieni mas-saqaf ta' ħalqi, jekk ma niftakarx fik

Għax hemm, dawk li jassruna,
talbuna ngħannulhom xi għanja;
dawk li hemm għakksuna stennew minna għana ta' ferħ:
"Għannulna mill-għana ta' Sijon."
Jeħilli lsieni mas-saqaf ta' ħalqi, jekk ma niftakarx fik

Kif nistgħu ngħannu l-għana tal-Mulej f'art barranija?
Tibbiesli idi l-leminija, jekk qatt ninsa lilek, Ġerusalemm!
Jeħilli lsieni mas-saqaf ta' ħalqi, jekk ma niftakarx fik

Jeħilli lsieni mas-saqaf ta' ħalqi, jekk ma niftakarx fik,
jekk ma nżommx 'il Ġerusalemm 'il fuq minn kull ferħ tiegħi!
Jeħilli lsieni mas-saqaf ta' ħalqi, jekk ma niftakarx fik

Evanġelju Luqa 9, 57-62

Kif Ġesu’ u d-dixxipli tiegħu kienu miexja fit-triq kien hemm wieħed li qallu: "Tmur fejn tmur, jiena niġi warajk." U qallu Ġesù: "Il-volpijiet għandhom l-għerien tagħhom u l-għasafar ta' l-ajru l-bejtiet, iżda Bin il-bniedem ma għandux fejn imidd rasu." Lil wieħed ieħor qallu: "Imxi warajja." Iżda dak wieġbu: "Ħallini l-ewwel immur nidfen lil missieri." Iżda hu wieġbu: "Ħalli l-mejtin jidfnu l-mejtin tagħhom; iżda int mur u xandar is-Saltna ta' Alla." U ieħor ukoll qallu: "Jien niġi, Mulej, warajk, imma l-ewwel ħallini nsellem lil tad-dar." Qallu Ġesù: "Min iqiegħed idu fuq il-moħriet u jħares lura m'huwiex tajjeb għas-Saltna ta' Alla."

It-Tlieta 29 ta’ Settembru

It-Tlieta 29 ta’ Settembru Festa ta’ San Mikiel, San Rafel u San Gabriel, Arkanġli

L-Ewwel Qari Danjel 7, 9-10 ; 13-14 jew Apokalissi 12,7-12b

Danjel 7, 9-10 ; 13-14

Kont għadni qiegħed inħares, meta tqiegħdu xi tronijiet, u wieħed Xiħ fl-għomor qagħad bilqiegħda; lbiesu abjad silġ, u xuxtu bajda suf; ilsna tan-nar it-tron tiegħu, nar iħeġġeġ ir-roti tiegħu; xmara ta' nar kienet għaddejja, ħierġa minn quddiemu; eluf ta' eluf kienu jaqduh, u għaxart elef ta' għaxriet ta' eluf wieqfa quddiemu. Il-Qorti qagħdet bilqiegħda, u l-kotba nfetħu. "U billejl deherli qiegħed nara bħal iben ta' bniedem, ġej mis-sħab tas-sema, li baqa' sejjer sax-Xiħ fl-għomor u ressquh quddiemu. U tawh ħakma, ġieħ, u saltna, biex lilu jaqdi kull ġens, u poplu, u lsien. Ħakmietu ħakma għal dejjem li ma tgħaddix, u saltnatu li ma tinqeridx.

Jew

Apokalissi 12,7-12b

Mbagħad qamet gwerra fis-sema: Mikiel u l-anġli tiegħu jitqabdu mad-Dragun. U d-Dragun u l-anġli tiegħu tqabdu, iżda ma kellhomx ħila jegħlbu, u ma kienx hemm iżjed post għalihom fis-sema. U kien imwaddab id-Dragun il-kbir, is-Serp tal-qedem, li hu msejjaħ id-Demonju u x-Xitan, il-qarrieq tad-dinja kollha, kien imwaddab għal fuq l-art, u miegħu kienu mwaddba l-anġli tiegħu. U smajt leħen qawwi fis-sema jgħid: "Issa ġiet is-salvazzjoni u l-qawwa, u s-Saltna ta' Alla tagħna, u s-setgħa tal-Messija tiegħu, għax twaddab 'il barra dak li jixli 'l ħutna, li lejl u nhar jixlihom quddiem Alla tagħna. U huma ħarġu rebbieħa fuqu permezz tad-demm tal-Ħaruf u bis-saħħa tal-kelma li xehdu, u ma għożżewx ħajjithom, minkejja saħansitra l-mewt. Għalhekk ifirħu, smewwiet, u intom li tgħammru fihom."

Salm Responsorjali Salm 138, 1-2b; 2c-3; 4-5
Quddiem l-anġli rrid ngħannilek

Nroddlok ħajr, Mulej, b'qalbi kollha,
għaliex int smajt kliem fommi. Quddiem l-anġli rrid ngħannilek.
B'wiċċi fl-art ninxteħet quddiem is-santwarju tiegħek,
u nroddlok ħajr għat-tjieba u l-fedeltà tiegħek.
Quddiem l-anġli rrid ngħannilek

Għax int kabbart ismek u kelmtek fuq kollox.
Meta sejjaħtlek, int weġibtni, kattarli l-qawwa f'ruħi.
Quddiem l-anġli rrid ngħannilek

Iroddulek ħajr, Mulej, is-slaten kollha ta' l-art,
għaliex semgħu l-kliem ta' fommok.
U jgħannu l-imġiba tal-Mulej, għax kbir hu sebħ il-Mulej.
Quddiem l-anġli rrid ngħannilek

Evanġelju Ġwanni 1, 47-51

Meta Ġesù ra lil Natanjel riesaq lejh qal għalih: "Ara, dan tassew wieħed minn Iżrael li jixraqlu dan l-isem; ma hemm ebda qerq fih." Natanjel staqsieh: "Kif sirt tafni?" U Ġesù wieġbu: "Rajtek taħt is-siġra tat-tin qabel ma sejjaħlek Filippu." "Rabbi?" qallu Natanjel,"int l-Iben ta' Alla, inti s-sultan ta' Iżrael?" Ġesù wieġbu: "Qiegħed temmen għax għedtlek li rajtek taħt is-siġra tat-tin? Għad tara ħwejjeġ akbar minn dawn?" U żied jgħidlu: "Tassew tassew ngħidilkom, għad taraw is-sema miftuħ u l-anġli ta' Alla telgħin u niżlin fuq Bin il-bniedem."

It-Tnejn 28 ta’ Settembru

It-Tnejn 28 ta’ Settembru It-Tnejn tas-26 ġimgħa ta’ matul is-sena

L-Ewwel Qari Żakkarija 8, 1-8

U ġiet il-kelma tal-Mulej ta' l-eżerċti u qalli: Hekk jgħid il-Mulej ta' l-eżerċti: "Jien għajjur fuq li għajjur għal Sijon, għajjur għaliha b'korla li ma bħalha." Dan jgħid il-Mulej: "Mill-ġdid indur lejn Sijon, u niġi ngħammar f'nofs Ġerusalemm. Mbagħad lil Ġerusalemm jibdew ixandruha bħala 'il-Belt il-fidila', u l-muntanja tal-Mulej tal-eżerċti bħala 'il-Muntanja l-qaddisa'." Dan jgħid il-Mulej: "Il-pjazez ta' Ġerusalemm għad jerġgħu joqogħdu fihom ix-xjuħ, rġiel u nisa, kulħadd bil-bastun f'idu minħabba t-tul ta' għomru. U l-pjazez tal-belt jimtlew bi tfal subjien u bniet, jilagħbu fil-wesgħat tagħha." Hekk jgħid il-Mulej ta' l-eżerċti: "Jekk illum din hija ħaġa ta' l-għaġeb f'għajnejn fdal dan il-poplu, se tkun ta' l-għaġeb f'għajnejja wkoll?" Oraklu tal-Mulej ta' l-eżerċti. Dan jgħid il-Mulej ta' l-eżerċti: "Ara, jiena nsalva l-poplu tiegħi mil-lvant u mill-punent, u nġibhom lura biex jgħammru f'nofs Ġerusalemm; u huma jkunu l-poplu tiegħi, u jiena nkun Alla tagħhom, fidil u ġust."

Salm Responsorjali Salm 102,16-18 ; 19-21 ; 29 ; 22-23
Il-Mulej jerġa' jibni lil Sijon, u jidher fis-sebħ tiegħu

Ħa jkollhom il-ġnus il-biża' ta' ismek, Mulej,
u s-slaten kollha ta' l-art il-biża' tas-sebħ tiegħek,
meta l-Mulej jerġa' jibni lil Sijon, u jidher fis-sebħ tiegħu.
U jisma' t-talb tal-mitluqin, ma jistmellx it-talb tagħhom.
Il-Mulej jerġa' jibni lil Sijon, u jidher fis-sebħ tiegħu

Jinkiteb dan għan-nisel li għad jiġi, u poplu ġdid għad ifaħħar lill-Mulej.
Il-Mulej iħares 'l isfel mill-għoli tas-santwarju tiegħu,
u jittawwal mis-sema lejn l-art,
biex jisma' l-krib ta' l-ilsiera, biex jeħles 'il dawk li huma għall-mewt.”
Il-Mulej jerġa' jibni lil Sijon, u jidher fis-sebħ tiegħu

Ulied il-qaddejja tiegħek ikollhom darhom;
nisilhom jibqa' għal dejjem quddiemek."
U hekk jixxandar f'Sijon isem il-Mulej,
u f'Ġerusalemm it-tifħir tiegħu,
meta l-popli flimkien jinġemgħu,
u saltniet biex jaqdu l-Mulej.
Il-Mulej jerġa' jibni lil Sijon, u jidher fis-sebħ tiegħu

L-Evanġelju Lq 9, 46-50

Qamet kwistjoni bejniethom id-dixxipli dwar min kien l-akbar fosthom. Ġesù għaraf x'kellhom f'moħħhom, u ressaq tifel żgħir lejh, qiegħdu maġenbu, u qalilhom: "Min jilqa' lil dan it-tifel żgħir minħabba f'ismi, ikun jilqa' lili; u min jilqa' lili, ikun jilqa' lil dak li bagħatni. Għax min hu l-iżgħar fostkom ilkoll, dak hu l-kbir." Qabeż Ġwanni u qallu: "Mgħallem, rajna wieħed ikeċċi x-xjaten f'ismek, u ridna nżommuh, għax hu m'huwiex wieħed minn tagħna." Imma Ġesù qallu: "La żżommuhx, għax min m'huwiex kontra tagħkom, huwa magħkom."

Il-Ħadd 27 ta’ Settembru

Il-Ħadd 27 ta’ Settembru Is-26 Ħadd ta’ matul is-sena

L-Ewwel Qari Numri 11, 25-29

Il-Mulej niżel fi shaba jkellem lil Mosè, u ha mill-ispirtu li kellu fih, u tah lis-sebghin xih; u gara li, hekk kif l-ispirtu qaghad fuqhom, bdew jipprofetizzaw, imma ma ssuktawx. Issa fil-kamp kien baqa' żewgt irgiel, wiehed jismu Eldad u l-iehor Medad, u fuqhom ukoll niżel l-ispirtu. Hekk dawn gew maghduda mal-maghżulin ghax, ghalkemm ma marrux fit-tinda, bdew jipprofetizzaw fil-kamp. Dlonk mar wiehed żaghżugh jgharraf b'dan lil Mosè, u qallu: ̋Eldad u Medad qeghdin jipprofetizzaw fil-kamp.̏ U Gożwè bin Nun, li minn ckunitu kien qaddej ta' Mosè, qabad u qal: ̋Sidi Mosè, thallihomx aktar.̏ Iżda Mosè wiegbu: ̋Jaqaw qieghed tghir minhabba fija? Jalla l-poplu tal-Mulej ikun kollu profeti, u jalla l-Mulej iqieghed fuqhom l-ispirtu tieghu!̏

Salm Responsorjali Salm 19, 8; 10; 12-13; 14
Il-preċetti tal-Mulej iferrħu l-qalb

Il-liġi tal-Mulej perfetta, u tagħti l-ħajja;
ix-xhieda tal-Mulej hi sewwa, u tgħallem lil min ma jafx.
Il-preċetti tal-Mulej iferrħu l-qalb

Il-biża' tal-Mulej sinċier, u jibqa' għal dejjem;
il-ġudizzji tal-Mulej sewwa,
u mseddqa għalkollox;
Il-preċetti tal-Mulej iferrħu l-qalb

Fehemhom sewwa l-qaddej tiegħek;
ħlas tajjeb għandu min iħarishom.
In-nuqqas min jista' jagħrfu?
Minn dak li ma nafx bih saffini.
Il-preċetti tal-Mulej iferrħu l-qalb

U mill-kburija wkoll ħares il-qaddej tiegħek,
tħalliha qatt taħkimni.
Mbagħad inkun bla ħtija u
ħieles minn dnub kbir.
Il-preċetti tal-Mulej iferrħu l-qalb

It-Tieni Qari Ġakbu 5,1-6

Ejjew issa, intom l-għonja, ibku u ixhru fuq l-għawġ li ġej fuqkom! Ġidkom tħassar, ħwejjiġkom kilithomlkom il-kamla. Id-deheb u l-fidda tagħkom rabbew is-sadid, u s-sadid tagħkom għad jixhed kontra tagħkom u jiklilkom ġisimkom bħan-nar. Ħżintu l-ġid fl-aħħar jiem! Ara, il-ħlas tal-ħaddiema li ħasdu l-għelieqi tagħkom - ħlas li intom żammejtuhulhom bil-qerq - qiegħed jgħajjat kontra tagħkom, u l-biki ta' dawk li ħasdu wasal f'widnejn il-Mulej ta' l-eżerċti. Fuq l-art għextu fix-xalar u l-lussu; qgħadtu tissemmnu għall-jum tal-qatla. Intom ikkundannajtu l-ġust, qtiltuh għax ma jistax jiqfilkom!

L-Evanġelju Mk 9, 38-43; 45; 47-48

F’dak iż-żmien Ġwanni qal lil Ġesu’ "Mgħallem, wieħed raġel, li s-soltu ma jkunx magħna, rajnieh ikeċċi x-xjaten f'ismek u ridna nżommuh, għax hu m'huwiex wieħed minn tagħna." Imma Ġesù qal: "La żżommuhx, le, għax ma hemm ħadd li se jagħmel miraklu f'ismi u mbagħad malajr se jkollu ħila jgħid kontra tiegħi. Għax min m'huwiex kontra tagħna, huwa magħna. "Min jagħtikom tazza ilma x'tixorbu għax intom tal-Messija, ngħidilkom is-sewwa li ma jibqax mingħajr il-ħlas tiegħu. Imma min jagħti skandlu lil wieħed minn dawn iċ-ċkejknin li jemmnu fija, ikun jaqbillu jekk jorbtulu ma' għonqu ġebla tat-tħin minn dawk li jdawwru l-ħmir u jixħtuh fil-baħar. U jekk idek hija għalik okkażjoni ta' dnub, aqtagħha barra; jaħbatlek aħjar li tidħol b'id waħda fil-ħajja, milli li tmur b'idejk it-tnejn fl-infern, fin-nar li ma jintefiex. U jekk riġlek hu għalik okkażjoni ta' dnub, aqtgħu barra; jaħbatlek aħjar li tidħol b'riġel wieħed fil-ħajja, milli tinxteħet b'riġlejk it-tnejn fl-infern. U jekk għajnek hi għalik okkażjoni ta' dnub, aqlagħha barra; jaħbatlek aħjar li tidħol b'għajn waħda fis-Saltna ta' Alla milli tinxteħet b'għajnejk it-tnejn fl-infern, fejn id-dud tagħhom ma jmutx u fejn in-nar ma jintefiex.

Is-Sibt 26 ta’ Settembru

Is-Sibt 26 ta’ Settembru Is-Sibt tal-25 ġimgħa ta’ matul is-sena

L-Ewwel Qari Żakkarija 2, 5-9; 14-15a

Jiena Żakkarija erfajt għajnejja u ħarist, u ara kien hemm raġel li f'idu kellu ħabel biex iqis. U jien għedtlu: "Fejn inti sejjer?" U hu weġibni: "Sejjer inqis 'il Ġerusalemm, biex nara kemm hu l-wisa' tagħha u kemm hu t-tul tagħha." U ara, l-anġlu li kien kellimni waqaf u anġlu ieħor resaq jiltaqa' miegħu. U dak qallu: "Iġri, kellem lil dak iż-żagħżugħ u għidlu: 'Ġerusalemm tkun mgħammra bħal bliet mingħajr swar, daqs kemm ikun hemm nies u bhejjem ġo fiha. U jien inkun għaliha, oraklu tal-Mulej, ħajt tan-nar madwarha, u nkun is-sebħ tagħha f'nofsha." Għajjat bil-ferħ u infexx fl-hena, bint Sijon. għaliex arani ġej biex ngħammar f'nofsok, oraklu tal-Mulej,[Żak:2:15] u kotra kbira ta' ġnus jingħaqdu dakinhar mal-Mulej; u huma jkunu l-poplu tiegħi. U jiena ngħammar f'nofsok.

Salm Responsorjali Ġeremija 31, 10 ; 11-12b ; 13
Il-Mulej iħarisna kif ragħaj iħares il-merħla tiegħu

"Isimgħu, ġnus, kelmet il-Mulej,
xandruha 'l bogħod fil-gżejjer:
għidu: 'Dak li xerred lil Iżrael jiġbru,
u jħarsu kif ragħaj iħares il-merħla tiegħu.'
Il-Mulej iħarisna kif ragħaj iħares il-merħla tiegħu

Għax il-Mulej feda lil Ġakobb,
ħelsu minn id wieħed aqwa minnu.
Għad jiġu u jgħannu fuq l-għolja ta' Sijon,
u wiċċhom jiddi minħabba t-tjieba tal-Mulej
Il-Mulej iħarisna kif ragħaj iħares il-merħla tiegħu

"Mbagħad jifirħu x-xbejbiet biż-żfin,
jifirħu ż-żgħażagħ u x-xjuħ;
u jiena nbiddel il-vistu tagħhom f'hena,
nfarraġhom u nferraħhom wara l-hemm tagħhom.
Il-Mulej iħarisna kif ragħaj iħares il-merħla tiegħu

l-Evanġelju Lk 9, 43b-45

Kif kienu lkoll imnixxfin bil-għaġeb quddiem dan il-kobor li ma bħalu ta' Alla Ġesu’ qal lid-dixxipli tiegħu "Iftħu widnejkom sewwa għal dawn il-kelmiet: Bin il-bniedem għandu jkun mogħti f'idejn il-bnedmin." Iżda huma ma fehmuhx dan il-kliem, u baqa' mistur għalihom hekk li ma qabdu xejn minnu, u beżgħu jistaqsuh dwar dak li kien qal.

Il-Ġimgħa 25 ta’ Settembru

Il-Ġimgħa 25 ta’ Settembru Il-Ġimgħa tal-25 ġimgħa ta’ matul is-sena

L-Ewwel Qari Ħaggaj 2, 1-9

Fit-tieni sena tas-sultan Dariju, fis-seba' xahar, fil-wieħed u għoxrin tax-xahar, ġiet il-kelma tal-Mulej permezz ta' Ħaggaj, il-profeta, u qallu: "Isa, mur kellem lil Żerubbabel bin Sijaltijel, gvernatur ta' Ġuda, u lil Ġożwè bin Ġeħosadak, il-qassis il-kbir, u lill-bqija tal-poplu, u għidilhom:Min għad baqa' fostkom li ra dan it-tempju fil-glorja li kellu qabel? U issa kif qegħdin tarawh? F'għajnejkom m'hux forsi qisu xejn? Imma issa qawwi qalbek, Żerubbabel, oraklu tal-Mulej, qawwi qalbek, Ġożwè bin Ġeħosadak, il-qassis il-kbir; qawwi qalbek, poplu tal-pajjiż, oraklu tal-Mulej. Aqbdu aħdmu, għax jiena magħkom, oraklu tal-Mulej ta' l-eżerċti. Il-kelma li biha ntrabbat magħkom fi ħruġkom mill-Eġittu, u l-ispirtu tiegħi, jibqgħu f'nofskom: la tibżgħux?" Għax hekk jgħid il-Mulej ta' l-eżerċti: "Dalwaqt, ftit ieħor biss, u jiena nheżheż is-smewwiet u l-baħar u l-blat, u nqanqal il-ġnus kollha, u l-ġid kollu tal-popli jiġi kollu hawn, u nimla dan it-tempju bil-glorja?" jgħid il-Mulej ta' l-eżerċti. "Tiegħi l-fidda u tiegħi d-deheb, oraklu tal-Mulej ta' l-eżerċti. Il-glorja ta' l-aħħar ta' dan it-tempju tkun akbar minn ta' qabel?" jgħid il-Mulej ta' l-eżerċti,"u f'dan il-post jiena nagħti s-sliem?" oraklu tal-Mulej ta' l-eżerċti.

Salm Responsorjali Salm 43,1; 2; 3; 4
It-tama tiegħi f’Alla; Infaħħru, is-Salvatur tiegħi u Alla tiegħi

Agħmel ħaqq miegħi int, Mulej, u min-nies bla tjieba ddefendi
l-kawża tiegħi; min-nies qarrieqa u ħżiena eħlisni.
It-tama tiegħi f’Alla; Infaħħru, is-Salvatur tiegħi u Alla tiegħi

Inti l-kenn tiegħi, o Alla; għaliex warrabtni?
Għax għandi ngħix imdejjaq taħt it-tagħkis ta' l-għadu?
It-tama tiegħi f’Alla; Infaħħru, is-Salvatur tiegħi u Alla tiegħi

Ibgħat id-dawl tiegħek u s-sewwa tiegħek; huma jmexxuni;
iwassluni sa l-għolja mqaddsa tiegħek u sa l-għerejjex tiegħek.
It-tama tiegħi f’Alla; Infaħħru, is-Salvatur tiegħi u Alla tiegħi

U nidħol ħdejn l-artal ta' Alla, ħdejn Alla, ferħ u hena tiegħi.
U nroddlok ħajr biċ-ċetra, o Alla, Alla tiegħi.
It-tama tiegħi f’Alla; Infaħħru, is-Salvatur tiegħi u Alla tiegħi

Evanġelju Lk 9,18-22

Darba, waqt li kien qiegħed jitlob waħdu, kien hemm miegħu d-dixxipli tiegħu, u hu staqsiehom: "Min jgħidu n-nies li jien?" Huma weġbuh u qalulu: "Ġwanni l-Battista; oħrajn, Elija; u oħrajn, li qam wieħed mill-profeti ta' l-imgħoddi." Qalilhom: "Imma intom min tgħidu li jien?" Qabeż Pietru u qallu: "Inti l-Messija ta' Alla." Mbagħad ikkmandahom u qalilhom ħafna biex ma jgħidu lil ħadd b'dan. U qalilhom: "Jeħtieġ li Bin il-bniedem ibati ħafna, jiċħduh ix-xjuħ u l-qassisin il-kbar u l-kittieba, joqtluh, u fit-tielet jum iqum."

L-Ħamis 24 ta’ Settembru

Il-Ħamis 24 ta’ Settembru Il-Ħamis tal-25 ġimgħa ta’ matul is-sena

L-Ewwel Qari Ħaggaj 1, 1-8

Fit-tieni sena tas-sultan Dariju, fis-sitt xahar, fl-ewwel tax-xahar, il-Mulej, permezz tal-profeta Ħaggaj, kellem lill Żerubbabel bin Sijaltijel, gvernatur ta' Ġuda, u lil Ġożwè bin Ġeħosadak, il-qassis il-kbir, u qalilhom: "Dan jgħid il-Mulej ta' l-eżerċiti: 'Dan il-poplu jgħid: It-tempju tal-Mulej għad ma wasallux iż-żmien li jinbena mill-ġdid!'?" U l-Mulej tkellem permezz tal-profeta Ħaggaj u qal: "Jaqaw għalikom huwa issa l-waqt li intom tgħammru fi djarkom imsaqqfa waqt li din id-dar għadha ħerba?" U issa dan jgħid il-Mulej ta' l-eżerċiti: "Ġibu quddiem għajnejkom minn xiex għaddejtu! Bosta żrajtu, imma ftit ħżintu; kiltu, u m'hemmx li tiskru; lbistu, u m'hemmx li tisħnu; u l-ħaddiem mikri jqiegħed ħlasu f'but imtaqqab." Dan jgħid il-Mulej ta' l-eżerċiti: "Ġibu quddiem għajnejkom minn xiex għaddejtu! Itilgħu fuq il-muntanja, ġibu l-injam u ibnu d-dar, u jien nitgħaxxaq biha u nissebbaħ fiha?" jgħid il-Mulej.

Salm Responsorjali Salm 149,1b-2; 3-4; 5-6a;9b
il-Mulej jitgħaxxaq bil-poplu tiegħu

Għannu lill-Mulej għanja ġdida: fil-ġemgħa
ta' ħbiebu t-tifħir tiegħu!
Ħa jifraħ Iżrael bil-Ħallieq tiegħu, u jithennew ulied Sijon
bis-sultan tagħhom!
il-Mulej jitgħaxxaq bil-poplu tiegħu

Ħa jfaħħru biż-żfin l-isem tiegħu,

bid-daqq tat-tanbur u
taċ-ċetra!
Għax il-Mulej jitgħaxxaq bil-poplu tiegħu,

u jsebbaħ lill-fqajrin bir-rebħa.
il-Mulej jitgħaxxaq bil-poplu tiegħu

Bil-glorja jithennew ħbiebu,

u jaqbżu bil-ferħ fuq friexhom!
It-tifħir ta' Alla jkun fuq fommhom
Dan hu ġieħ għall-ħbieb tiegħu kollha.
il-Mulej jitgħaxxaq bil-poplu tiegħu

Evanġelju Lq 9,7-9

Dawn il-ġrajja kollha waslu f'widnejn Erodi t-tetrarka u beda jitħasseb, għaliex xi wħud kienu qegħdin jgħidu li Ġwanni qam mill-imwiet, waqt li oħrajn qalu li deher Elija, u oħrajn li qam wieħed mill-profeti ta' l-imgħoddi. Iżda Erodi qal: "Lil Ġwanni qtajtlu rasu; mela min hu dan li fuqu qiegħed nisma' dan kollu?" U beda jfittex li jarah.

L-Erbgħa 23 ta’ Settembru

L-Erbgħa 23 ta’ Settembru L-Erbgħa tal-25 ġimgħa ta’ matul is-sena

L-Ewwel Qari Esdra 9,5-9

Xħin kienu qed joffru s-sagrifiċċju ta' filgħaxija, jien qomt mill-għajb tiegħi, u bi ħwejġi u l-mantar tiegħi mċarrtin inżilt għarkubbtejja, u ftaħt idejja lejn il-Mulej, Alla tiegħi, u għedt: Minn żmien missirijietna sa llum waqajna fi ħtijiet kbar u minħabba fi dnubietna, aħna, is-slaten tagħna, u l-qassisin tagħna, ġejna mogħtija f'idejn slaten barranin. Dawn darbuna bix-xabla, ħaduna fl-eżilju, ħadulna ġidna, u ġejna fl-għajb li qegħdin fih illum. Imma issa, il-Mulej, Alla tagħna, tana grazzja għal ftit taż-żmien, billi ħallielna fdal u tana fuqiex nafdaw, jiġifieri dan il-post qaddis. B'hekk Alla tagħna ried iferraħna u jgħajjixna għal ftit fl-eżilju tagħna. Għax aħna lsiera; imma Alla tagħna ma nsiniex fl-eżilju tagħna, għax wera l-ħniena tiegħu magħna quddiem is-slaten tal-Persja, meta tana mill-ġdid il-ħajja ħa nerġgħu ntellgħu t-tempju ta' Alla tagħna, u nerġgħu nibnuh mill-ħerba tiegħu u b'hekk ikollna kenn f'Ġuda u Ġerusalemm.

Salm Responsorjali Tobit 13,2; 3-4a; 4b; 7-8
Mbierek Alla, li jgħix għal dejjem

Alla jikkastiga u jħenn; iwasslek sal-qabar f'qiegħ l-art,
u mbagħad jerfgħek mill-akbar qerda.
M'hemm ħadd li jeħles minn idejh.
Mbierek Alla, li jgħix għal dejjem

Faħħruh, ulied Iżrael, quddiem il-ġnus!
Hu xerridkom f'nofshom.
U hemm uriekom il-kobor tiegħu.
Mbierek Alla, li jgħix għal dejjem

Ara x'għamel magħkom!
Faħħruh b'kemm għandkom ħila,
u bierku l-Mulej il-ġust, u faħħru s-sultan ta' dejjem.
Mbierek Alla, li jgħix għal dejjem

Nfaħħru jien f'art l-eżilju tiegħi,
u nuri l-qawwa u l-kobor tiegħu lill-ġens midneb.
Mbierek Alla, li jgħix għal dejjem


Evanġelju Lk 9:1-6

Ġesu’ sejjaħ lit-Tnax madwaru u tahom qawwa u setgħa fuq ix-xjaten kollha u li jfejjqu l-mard. U bagħathom ixandru s-Saltna ta' Alla u jfejjqu l-morda. U qalilhom: "Tieħdu xejn magħkom għat-triq, la ħatar, la ħorġa, la ħobż u lanqas flus, u lanqas ma jkollkom żewġ ilbiesi. Jekk tidħlu f'xi dar, ibqgħu hemm sa ma tiġu biex titilqu. Jekk ma jilqgħukomx, oħorġu minn dik il-belt u farfru sa t-trab tagħha minn ma' riġlejkom bħala xhieda kontrihom." Ħarġu, mela, u bdew iduru l-irħula jxandru l-Evanġelju u jfejjqu l-morda kullimkien.

It-Tlieta 22 ta’ Settembru

It-Tlieta 22 ta’ Settembru Tlieta tal-25 ġimgħa ta’ matul is-sena

L-Ewwel Qari Esdra 6,7-8; 12b; 14-20

Ir-re Darju ħareġ ordni lill-uffiċjali tiegħu fuq n-naħa l-oħra ta' l-Ewfrat: Ħallu x-xogħol fuq dan it-tempju ta' Alla jibqa' miexi; ħallu l-gvernatur u l-kapijiet tal-Lhud jibnu dan it-tempju ta' Alla fil-post li kellu qabel. U nordna b'digriet: Dan hu li għandkom tagħmlu għall-kapijiet tal-Lhud għall-bini ta' dan it-tempju ta' Alla: l-ispejjeż għandhom jitħallsu lil dawn in-nies bla waqfien mit-taxxi tan-naħa l-oħra ta' l-Ewfrat, li huma propjetà tas-sultan. Jien, Darju, nordna dan b'digriet. Ħa jkun obdut kollu kemm hu."

Il-kapijiet tal-Lhud komplew jibnu u jmexxu x-xogħol 'il quddiem imħeġġin mill-profeta Ħaggaj u mill-profeta Żakkarija bin Għiddu. U lestew il-bini kif ordnalhom Alla ta' Iżrael, u kif kienu ordnawlhom Ċiru, u Darju, u Artasersi, slaten tal-Persja. Dan it-tempju lestewh fit-tlieta tax-xahar ta' Adar, fis-sitt sena tas-saltna tas-sultan Darju. U wlied Iżrael, il-qassisin, il-Leviti, u l-bqija ta' dawk li kienu ġew lura mill-eżilju, kollhom ferħana għamlu l-festa tal-konsagrazzjoni ta' dan it-tempju. U għall-konsagrazzjoni ta' dan it-tempju offrew b'sagrifiċċju mitt gendus, mitejn muntun, erba' mitt ħaruf; u għal dnubiet Iżrael kollu offrew tnax-il gidi skond kemm kienu tribujiet ta' Iżrael. Mbagħad qassmu l-qassisin skond it-taqsimiet tagħhom u l-Leviti fil-ġemgħat tagħhom għas-servizz ta' Alla f'Ġerusalemm, kif inhu miktub fil-Liġi ta' Mosè. Dawk li ġew lura mill-eżilju għamlu l-festa ta' l-Għid fl-erbatax ta' l-ewwel xahar. Il-qassisin u l-Leviti ssaffew flimkien, u għax kienu safja setgħu joqtlu l-ħaruf ta' l-Għid għal dawk kollha li kienu ġew lura mill-eżilju u għal ħuthom il-qassisin, u għalihom stess.

Salm Responsorjali Salm 122,1-2; 3-4b; 4c-5

Immorru ferħana f’dar il-Mulej

Fraħt meta qaluli: "Sejrin f'dar il-Mulej"
Diġà qegħdin riġlejna fi bwiebek, Ġerusalemm!
Immorru ferħana f’dar il-Mulej

Ġerusalemm, mibnija bħal belt, magħquda ħaġa waħda.
Lejha t-tribujiet jitilgħu, it-tribujiet tal-Mulej.
Immorru ferħana f’dar il-Mulej

Biex, skont il-liġi ta' Iżrael, ifaħħru isem il-Mulej.
Għax hemm twaqqfu t-tronijiet tal-ħaqq, it-tronijiet tad-dar ta' David.
Immorru ferħana f’dar il-Mulej

Evanġelju Lq 8,19-21

F’dak iż-żmien: Ġew għal Ġesu’ ommu u ħutu, iżda ma setgħux jersqu lejh minħabba l-folla. Xi ħadd qallu: "Ommok u ħutek qegħdin hawn barra u jridu jarawk." Iżda hu weġibhom: "Ommi u ħuti huma dawk li jisimgħu l-kelma ta' Alla u jagħmlu li jgħid Hu."

It-Tnejn 21 ta’ Settembru

It-Tnejn 21 ta’ Settembru Festa ta’ San Mattew, Apostlu u Evanġelista

L-Ewwel Qari Efesin 4,1-7; 11-13

Għeżież: Inħeġġiġkom jien, il-priġunier tal- Mulej, biex timxu sewwa skond is-sejħa li biha kontu msejjħin; billi bl-umiltà kollha, bil-ħlewwa u bis-sabar, taħmlu u tħobbu 'l xulxin. Ħabirku biex iżżommu spirtu wieħed bir-rabta tas-sliem; ġisem wieħed u ruħ waħda, l-istess kif kontu msejjħa għal tama waħda; Mulej wieħed, fidi waħda, magħmudija waħda; Alla wieħed u Missier ta' kulħadd, li hu fuq kulħadd, b'kulħadd u f'kulħadd. Lil kull wieħed minna Alla tana l-grazzja skond il-qjies tad-don ta' Kristu. Hu għalhekk li tgħid l-Iskrittura: "Tela'?": xi jfisser dan għajr li hu niżel ukoll fl-inħawi l-aktar t'isfel ta' l-art? Dak li niżel huwa dak li tela' fuq is-smewwiet kollha, biex jimla kollox. U huwa dak li ta lil xi wħud li jkunu appostli, lil xi wħud profeti, lil xi wħud evanġelisti, lil xi wħud rgħajja u mgħallmin: Hekk jitrawwmu l-qaddisin għax-xogħol tal-ħidma tagħhom għall-bini tal-Ġisem ta' Kristu, sakemm aħna lkoll naslu biex insiru ħaġa waħda fil-fidi u fl-għarfien ta' l-Iben ta' Alla; nsiru raġel magħmul, fl-aħjar ta' żmienu. U hekk isseħħ il-milja ta' Kristu.

Salm Responsorjali Salm 19, 2-3; 4-5

Kliemhom jasal sal-art kollha

Is-smewwiet ixandru l-glorja ta' Alla, għemil idejh tħabbar il-firxa tas-sema.
Jum lil ieħor jagħti l-aħbar, lejl lil ieħor iwassal it-tagħrif.
Kliemhom jasal sal-art kollha

Ma hemmx aħbar u anqas kliem, ma hemmx leħen li ma jinstemax.
Ma' l-art kollha jasal leħenhom, mad-dinja kollha jixtered kliemhom.
Kliemhom jasal sal-art kollha

Evanġelju Mt 9:9-13

F’dak iż-żmien: Huwa u għaddej minn hemm, Ġesù ra wieħed bilqiegħda quddiem il-mejda tat-taxxi; kien jismu Mattew."Ejja warajja?" qallu. Dak qam u mar warajh. U ġara li, kif qagħad għandu għall-mejda, ġew bosta pubblikani u midinbin u qagħdu madwar il-mejda ma' Ġesù u d-dixxipli tiegħu. Meta raw dan il-Fariżej qalu lid-dixxipli: "Għaliex jiekol mal-pubblikani u l-midinbin l-Imgħallem tagħkom?"] Hu semagħhom, u qal: "It-tabib ma jeħtiġuhx dawk li huma f'saħħithom, iżda l-morda. Mela morru tgħallmu x'jiġifieri, 'Ħniena rrid, u mhux sagrifiċċju'; għax mhux lill-ġusti ġejt insejjaħ, iżda lill-midinbin."

Il-Ħadd 20 ta’ Settembru

Il-Ħadd 20 ta’ Settembru Il-Ħamsa u għoxrin Ħadd ta’ matul is-sena

L-Ewwel Qari Għerf 2, 12; 17-20
Il-Ħżiena jgħidu: “Nonsbulu lill-ġust għaliex hu ta' xkiel għalina fi triqitna, hu kontra l-għemejjel tagħna, iċanfarna għax niksru l-Liġi, jixlina għax immorru kontra t-tagħlim li ħadna. Jgħid li jagħraf 'l Alla, u jsejjaħ lilu nnifsu 'Bin il-Mulej'. Għalina hu ċanfira tal-fehmiet tagħna; narawh biss taħt għajnejna, idejjaqna. Għax m'hijiex bħal ta' l-oħrajn ħajtu, u ma tixbah lil ħadd l-imġiba tiegħu. Lilna jgħoddna ta' nies foloz, jistmell drawwietna bħal ħaġa moqżieża. Hieni jsejjaħ it-tmiem tal-ġusti, u jiftaħar li Alla missieru. Ħa naraw hux veru kliemu, naraw fl-aħħar x'se jsir minnu. Jekk il-ġust hu iben Alla, jaqbeż għalih Alla, u jeħilsu minn id l-għedewwa tiegħu. Nġarrbuh bit-tagħjir u l-moħqrija, biex naraw xi tjubija għandu u nkejjlu sa fejn jasal sabru. Naqtgħuhielu għall-mewt b'mistħija, għax, kif jgħid hu, għandu min iħarsu."

Salm Responsorjali Salm 54,3-4; 5; 6; 8
Alla hu dak li jgħini

B'ismek, o Alla, salvani; agħmilli ħaqq bil-qawwa tiegħek.
Isma', o Alla, it-talba tiegħi; agħti widen għal kliem fommi.
Alla hu dak li jgħini

Għax nies kburin qamu kontrija, nies kefrin jonsbuli ħajti;
ma jżommux 'l Alla quddiem għajnejhom.
Alla hu dak li jgħini

Ara, Alla l-għajnuna tiegħi; il-Mulej hu dak li jżommni.
Minn qalbi noffrilek is-sagrifiċċju; nrodd ħajr lil ismek, għax hu tajjeb.
Alla hu dak li jgħini

It-Tieni Qari Ġakbu 3, 16-4, 3

Għeziez: fejn hemm l-għira u l-ġlied, hemm issib it-taqlib u kull xorta ta' ħażen. L-għerf li ġej mis-sema, qabel kollox hu għerf safi, imbagħad hu għerf li jfittex is-sliem, it-tjubija u l-ħlewwa; huwa kollu ħniena u frott tajjeb, bla ma jħares lejn l-uċuħ u bla qerq. Dawk li jfittxu s-sliem jiżirgħu fis-sliem u jkollhom il-frott tal-ġustizzja. Mnejn hu ġej il-ġlied u t-tilwim bejnietkom? Jaqaw mhux minn dan, mill-passjonijiet li hemm jitqabdu f'ġisimkom? Tixtiequ, u ma ssibu xejn; mbagħad toqtlu, u tgħiru, bla ma tistgħu tieħdu xejn; mbagħad tiġġieldu u titqabdu. Ma għandkom xejn għax ma titolbux. Titolbu, u ma tiksbux, għax titolbu ħażin: titolbu ħa jkollkom xi tberbqu fix-xalar.

L-Evanġelu Mk 9, 30-37

F’dak iz-zmien Ġesu’ u d-dixxipli telqu u għaddew minn nofs il-Galilija, u ma ried li ħadd ikun jaf, għax beda jgħallem lid-dixxipli tiegħu u jgħidilhom: "Bin il-bniedem se jingħata f'idejn il-bnedmin u joqtluh; u meta jkun maqtul, wara tlitt ijiem iqum mill-mewt." Iżda huma ma fehmuhx dan il-kliem, u beżgħu jistaqsuh. Waslu Kafarnahum; u meta kienu d-dar staqsiehom: "X'kontu qegħdin titħaddtu bejnietkom fit-triq?" Iżda huma baqgħu siekta, għax fit-triq kienu qagħdu jitħaddtu bejniethom fuq min kien l-akbar. Mbagħad qagħad bilqiegħda, sejjaħ it-Tnax, u qalilhom: "Jekk xi ħadd irid ikun l-ewwel wieħed, għandu joqgħod wara kulħadd u jkun qaddej ta' kulħadd." U ressaq lejh tfajjel ċkejken, qiegħdu f'nofshom, ħaddnu bejn dirgħajh u qalilhom: "Kull min jilqa' wieħed minn dawn iċ-ċkejknin minħabba f'ismi, ikun jilqa' lili; u min jilqa' lili, ikun jilqa' mhux lili, imma lil dak li bagħatni."

Is-Sibt 19 ta' Settembru

Is-Sibt 19 ta' Settembru Is-Sibt tal-24 ġimgħa ta' matul is-sena

L-Ewwel Qari 1 Tim 6, 13-16

Għażiż: Inwissik quddiem Alla li jagħti l-ħajja lill-ħlejjaq kollha, u quddiem Kristu Ġesù li xehed u għamel l-istqarrija sabiħa quddiem Ponzju Pilatu. Nwissik biex tħares l-istruzzjonijiet li rċevejt u żżomm ruħek bla tebgħa u bla ħtija sa jum id-dehra ta' Sidna Ġesù Kristu, li għad juriha f'waqtha. Dak li hu l-hieni u waħdu setgħani, is-Sultan tas-slaten u s-Sid tas-sidien, li hu biss ma jmut qatt u jgħammar f'dawl li ħadd ma jista' jersaq lejh, hu li ebda bniedem qatt ma rah u anqas qatt jista' jarah. Lilu ġieħ u setgħa għal dejjem! Amen.

Salm Responsarjali Salm 100, 1-2, 3, 4, 5
Idħlu quddiem il-Mulej b’għana ferrieħi

Għajjtu bil-ferħ lill-Mulej, nies kollha ta' l-art,
aqdu bil-ferħ lill-Mulej, idħlu quddiemu b'għana ferrieħi.
Idħlu quddiem il-Mulej b’għana ferrieħi

Kunu afu li Jaħweh hu Alla, hu ħalaqna, u aħna tiegħu,
aħna l-poplu tiegħu u n-nagħaġ tal-mergħa tiegħu.
Idħlu quddiem il-Mulej b’għana ferrieħi

Idħlu b'għana ta' ħajr mill-bibien tiegħu, bit-tifħir fil-btieħi
tat-tempju tiegħu; roddulu ħajr u bierku ismu!
Idħlu quddiem il-Mulej b’għana ferrieħi

Għax twajjeb il-Mulej, għal dejjem it-tjieba tiegħu; minn żmien għal żmien il-fedeltà tiegħu.
Idħlu quddiem il-Mulej b’għana ferrieħi

Evanġelju Lq 8, 4-15

F’dak iż-żmien, billi nġemgħet kotra kbira ta' nies li kienu ġejjin lejh minn kull belt, u hu qalilhom din il-parabbola: "Wieħed bidwi ħareġ jiżra' ż-żerriegħa li kellu. Huwa u jiżra', xi żerrigħat waqgħulu mal-mogħdija u ntrifsu, u l-għasafar ta' l-ajru naqqruhom kollha. Oħrajn waqgħu fuq il-blat, u nibtu u nixfu, għax tira ma kellhomx. Oħrajn waqgħu qalb ix-xewk, u x-xewk kiber magħhom u ħonoqhom. Oħrajn waqgħu f'art tajba, u nibtu u għamlu l-frott kull waħda mija." Kif qal dan, rafa' leħnu u qal: "Min għandu widnejn biex jisma', ħa jisma'?" Id-dixxipli tiegħu staqsewh x'kienet dik il-parabbola. U hu qalilhom: "Lilkom ingħata li tagħrfu l-misteri tas-Saltna ta' Alla, iżda lill-bqija bil-parabboli,"Il-parabbola, mela, hija din; iż-żerriegħa hi l-kelma ta' Alla. Dawk ta' matul il-mogħdija huma dawk li jisimgħu, mbagħad jiġi x-Xitan u jaħtfilhom il-kelma minn qalbhom, li ma jmorrux jemmnu u jsalvaw. Dawk ta' fuq il-blat huma dawk li, meta jisimgħu l-kelma, jilqgħuha bil-ferħ, iżda billi ma jkollhomx għeruq jemmnu għal ftit taż-żmien, u meta jiġi fuqhom it-tiġrib jitilqu. Dawk li jaqgħu qalb ix-xewk huma dawk li jisimgħu, iżda aktar 'il quddiem l-inkwiet żejjed u l-għana u l-pjaċiri tal-ħajja joħonquhom u l-frott tagħhom ma jsirx. Imma dawk li jaqgħu f'art tajba huma dawk li jisimgħu l-kelma b'qalb tajba u sinċiera, jgħożżuha, u jagħmlu l-frott billi jżommu sħiħ.

Il-Ġimgħa 18 ta' Settembru

Il-Ġimgħa 18 ta' Settembru Il-Ġimgħa tal-24 ġimgħa ta' matul is-sena

L-Ewwel Qari 1 Tim 4, 2c-12

Għażiż: Dan għallem u wissi. Min jgħallem ħaġa oħra, min ma joqgħodx għall-kliem utieq ta' Sidna Ġesù Kristu u għat-tagħlim skond it-tjieba, dan ikun supperv u ma jkun jaf xejn, marid bil-marda tat-tilwim u kliem li ma jġibx ħlief għira u ġlied, tkasbir u suspetti ħżiena u tilwim bejn nies ta' moħħhom maqlub u nieqsa mill-verità; u mingħalihom it-tjieba qiegħda għal qligħ il-flus. It-tjieba fiha qligħ kbir, tassew, għal min hu kuntent b'dak li għandu; għax aħna xejn ma ġibna fid-dinja, u xejn ma nistgħu nieħdu magħna; sakemm għandna x'nieklu u x'nilbsu, dan għandu jkun biżżejjed għalina. Imma dawk li jridu jistagħnu jaqgħu fit-tiġrib u fix-xibka u f'ħafna xewqat bla sens u ta' ħsara li jitfgħu lill-bnedmin fil-qerda u t-telfien. Għax ir-regħba għall-flus hi l-għerq ta' kull ħażen; kien ħtija ta' din ir-regħba li xi wħud ħarġu barra mit-triq tal-fidi u nfnew b'niket kbir. Imma int, bniedem ta' Alla, aħrab dan kollu; fittex li jkollok il-ġustizzja, it-tjieba, il-fidi, l-imħabba, is-sabar, il-ħlewwa. Tqabad it-taqbida t-tajba tal-fidi; qis li tirbaħ il-ħajja ta' dejjem li għaliha kont imsejjaħ u li tagħha għamilt l-istqarrija sabiħa quddiem ħafna xhieda.

Salm Responsorjali Ps 49, 6-7; 8-10; 17-18; 19-20
Imberkin il-fqar fl-ispirtu għax tagħhom hija s-saltna tas-smewwiet

Għax għandi nibża' mill-jiem ħżiena, meta jdur għalija l-ħażen ta' dawk li jonsbuni?
F'ġidhom it-tama tagħhom; jiftaħru bil-kotra ta' l-għana tagħhom.
Imberkin il-fqar fl-ispirtu għax tagħhom hija s-saltna tas-smewwiet

Ħadd ma jista' jifdi lilu nnifsu, jew jagħti lil Alla l-prezz tal-fidwa tiegħu.
Għoli wisq il-prezz ta' ħajtu, qatt ma jkun biżżejjed,
biex wieħed jgħix għal dejjem u ma jara qatt il-qabar.
Imberkin il-fqar fl-ispirtu għax tagħhom hija s-saltna tas-smewwiet

Tibżax meta xi ħadd jistagħna, meta joktor il-ġieħ ta' daru.
Għax xejn ma jieħu f'mewtu, ġieħu ma jinżilx warajh.
Imberkin il-fqar fl-ispirtu għax tagħhom hija s-saltna tas-smewwiet

Mqar jekk f'ħajtu jħoss ruħu hieni, u jgħid li jfaħħruh għax jgħaddiha tajjeb;
imur ukoll mal-ġemgħa ta' missirijietu, li qatt aktar ma jaraw id-dawl.
Imberkin il-fqar fl-ispirtu għax tagħhom hija s-saltna tas-smewwiet

Evanġelju Lq 8, 1-3

F’dak iż-żmien, Ġesu’ qagħad idur l-ibliet u r-rħula, jippriedka u jxandar l-Evanġelju tas-Saltna ta' Alla. Kellu miegħu t-Tnax u xi nisa li kien fejjaqhom mill-ispirti ħżiena u mill-mard: Marija, li kienu jgħidulha ta' Magdala, li minnha kienu ħarġu seba' xjaten, Ġwanna, mart Ħuża, prokuratur ta' Erodi, Susanna, u ħafna oħrajn, li kienu jaqduhom minn ġidhom.

Il-Ħamis 17 ta’ Settembru

Il-Ħamis 17 ta’ Settembru Ħamis ta’ l-24 Ġimgħa ta' matul is-sena

L-Ewwel Qari 1Tim 4, 12-16

Għażiż: Qis li ħadd ma jmaqdrek għax inti żagħżugħ; kun ta' eżempju għal dawk li jemmnu, fi kliemek u fl-imġiba tiegħek, fl-imħabba, fil-fidi, fis-safa. Sa ma niġi, ħu ħsieb il-qari tal-Kotba Mqaddsa, it-twissijiet u t-tagħlim. Tinsiex il-grazzja li għandek fik, li kienet mogħtija lilek bis-saħħa tal-kliem tal-profezija u bit-tqegħid ta' l-idejn tal-presbiteri fuqek. Dawn il-ħwejjeġ ħu ħsiebhom, agħti ruħek għalihom, biex kulħadd jara li int miexi 'l quddiem. Għasses fuqek innifsek u fuq it-tagħlim tiegħek; żomm sħiħ f'dawn il-ħwejjeġ, għax, jekk tagħmel hekk, issalva lilek innifsek u lil dawk li jisimgħuk.

Salm Responsorjali Salm 111, 7-8; 9; 10

Kbar huma l-għemejjel tal-Mulej

Is-sewwa u l-ħaqq għemil idejh; ta' min joqgħod fuqhom il-preċetti tiegħu,
mwettqa għal dejjem ta' dejjem, magħmula bis-sewwa
u bid-dritt.
Kbar huma l-għemejjel tal-Mulej

Bagħat jifdi lill-poplu tiegħu, waqqaf għal dejjem il-patt tiegħu. Qaddis u tal-biża' hu ismu!
Kbar huma l-għemejjel tal-Mulej

Il-bidu ta' l-għerf hu l-biża' tal-Mulej: tassew bil-għaqal kull min jimxi bih, għal dejjem jibqa' t-tifħir tiegħu!
Kbar huma l-għemejjel tal-Mulej

Evanġelju Lq 7, 36-50

F'dak iż-żmien: Wieħed mill-Fariżej stieden lil Ġesù biex jiekol miegħu; Ġesù daħal għand il-Fariżew u qagħad għall-ikel. Issa fil-belt kien hemm midinba magħrufa. Din saret taf li kien qiegħed għall-ikel fid-dar tal-Fariżew; ġiebet vażett ta' l-alabastru biż-żejt ifuħ; u marret qagħdet warajh ħdejn riġlejh, tibki u xxarrablu riġlejh bi dmugħha u tixxuttahomlu b'xuxitha; mbagħad bisitlu riġlejh u dilkithomlu biż-żejt ifuħ. Kif ra hekk il-Fariżew li stiednu qal bejnu u bejn ruħu: "Dan, li kien profeta, kien ikun jaf min hi u x'mara hi din li qiegħda tmissu; kien ikun jaf, għax hi midinba?" Imma Ġesù qabad u qallu: "Xmun, għandi ħaġa xi ngħidlek.""Għid, mgħallem?" qallu dak. "Tnejn min-nies kellhom id-dejn ma' wieħed li jislef il-flus; wieħed kellu jagħtih ħames mitt dinar u l-ieħor ħamsin. Minn fejn iħallsu dejnhom ma kellhomx, u hu ħafrilhom it-tnejn. Min minnhom se jħobbu l-iżjed?" Wieġeb Xmun u qal: "Jidhirli jien li dak li ħafirlu l-iżjed.""Ħsibtha tajjeb?" qallu Ġesù. Mbagħad dar lejn il-mara u qal lil Xmun: "Qiegħed taraha lil din il-mara? Dħalt għandek, u ilma għal riġlejja ma tajtnix, iżda hi riġlejja xarrbithomli bi dmugħha u xxuttathomli b'xuxitha. Bewsa ma tajtnix, iżda hi minn xħin daħlet ma waqfitx tbusli riġlejja. Rasi ma dlikthilix biż-żejt, imma hi dilkitli riġlejja b'żejt ifuħ. Għalhekk ngħidlek li dnubietha, li kienu ħafna, nħafrulha, għax ħabbet ħafna; imma min jinħafirlu ftit, ftit iħobb." Mbagħad qal lilha: "Dnubietek maħfura." Dawk li kienu fuq il-mejda miegħu bdew jgħidu fihom infushom: "Dan min hu biex jaħfer id-dnubiet ukoll?" Iżda hu qal lill-mara: "Il-fidi tiegħek salvatek; mur bis-sliem."

Qari għall-Erbgħa 16 ta' Settembru, Tifkira Obbligatorju ta' San Kornelju, Papa u Martri, u San Ċiprijanu, Isqof u Martri

L-Ewwel Qari 1Tim 3, 14-16

Għażiż: Qiegħed niktiblek dan, għalkemm għandi tama qawwija li ma ndumx ma niġi għandek. Imma biex, jekk indum ma niġi, tkun taf kif wieħed għandu jġib ruħu fid-dar ta' Alla, li hi l-Knisja ta' Alla l-ħaj, kolonna u pedament tal-verità. Bla ebda dubju, kbir hu l-misteru tar-reliġjon tagħna: Hu deher fil-ġisem, kien iġġustifikat bl-Ispirtu, deher lill-anġli, ixxandar fost il-pagani, emmnuh fid-dinja, ittieħed fil-glorja.

Salm Responsorjali Salm 111, 1-2; 3-4; 5-6

Kbar huma l-għemejjel tal-Mulej

Nrodd ħajr lill-Mulej b'qalbi kollha, fil-laqgħa
tat-tajbin flimkien miġbura.
Kbar huma l-għemejjel tal-Mulej; ifittxuhom dawk kollha
li jitgħaxxqu bihom.

Kbar huma l-għemejjel tal-Mulej

Kollu ġmiel u kobor għemil il-Mulej; għal dejjem tibqa'
l-ġustizzja tiegħu.
Waqqaf tifkira bl-għeġubijiet tiegħu; twajjeb u ħanin il-Mulej.
Kbar huma l-għemejjel tal-Mulej

Hu jagħti l-għajxien lil min jibża' minnu, jiftakar għal dejjem
fil-patt tiegħu.

Wera lill-poplu tiegħu l-qawwa ta' għemilu, meta qassam lilhom art il-ġnus.

Kbar huma l-għemejjel tal-Mulej

Evanġelju Lq 7, 31-35

F'dak iż-żmien Ġesu' qal: "Ma' min, mela, se nxebbahhom in-nies ta' dan iż-żmien? Lil min jixbhu? Jixbhu lil qabda tfal bilqiegħda fil-pjazza, jgħajjtu lil xulxin u jgħidu, 'Daqqejnielkom il-flawt u ma żfintux, għannejnielkom għanja ta' niket u ma ħabbattux fuq sidirkom!' Għax tassew, ġie Ġwanni l-Battista, la jiekol ħobż u lanqas jixrob inbid, u intom tgħidu li 'għandu fih xitan'. Ġie Bin il-bniedem, jiekol u jixrob, u tgħidu, 'Araw, xi bniedem wikkiel u sakranazz, ħabib tal-pubblikani u l-midinbin!' Imma l-ulied ta' Alla kollha taw raġun lill-għerf tiegħu."