Aħbar Tajba - il-Qari tal-Quddiesa

SIT ELETTRONIKU GDID!

2010-02-06T21:15:00.000-08:00

Nixtiequ navzaw li dan il-blog mhuwiex ser jibqa' jintuza. L-istess servizz qed jigi moghti fuq www.ahbar-tajba.webs.com

Grazzi.

Il-Ħamis 22 t’Ottubru

2009-10-22T00:32:00.000-07:00

Il-Ħamis 22 t’Ottubru Il-Ħamis tat-29 ġimgħa ta’ matul is-sena

L-Ewwel Qari Rumani 6: 19-23

Qiegħed nitkellem magħkom ta' bnedmin li aħna, għax in-natura tagħkom dgħajfa. Bħalma l-membri ta' ġisimkom kontu jassartuhom għaż-żína u l-ħażen, hekk issa dawn l-istess membri jassruhom għall-ġustizzja biex tkunu qaddisin. Meta kontu lsiera tad-dnub, kontu ħielsa f'dak li għandu x'jaqsam mal-ġustizzja. Xi frott ħsadtu dak iż-żmien mill-ħwejjeġ li issa qegħdin iħammrulkom wiċċkom? It-tmiem ta' dawk il-ħwejjeġ hija l-mewt. Imma issa li ħlistu mid-dnub u sirtu lsiera ta' Alla, qegħdin taħsdu għalikom frott li jwassal għall-qdusija, u għandkom bħala tmiem il-ħajja ta' dejjem. Għax il-ħlas tad-dnub hu l-mewt, imma d-don li tana Alla huwa l-ħajja ta' dejjem fi Kristu Ġesù Sidna.

Salm Responsorjali Salm 1: 1-2, 3, 4 u 6

Hieni l-bniedem li jqiegħed fil-Mulej it-tama tiegħu.

Hieni l-bniedem li ma jimxix

fuq il-pariri tal-ħżiena,

li ma jiqafx fi triq il-ħatjin,

li ma joqgħodx fil-laqgħat taż-żeblieħa;

imma fil-liġi tal-Mulej hi l-għaxqa tiegħu,

lejl u nhar jaħseb fil-liġi tiegħu.

Hieni l-bniedem li jqiegħed fil-Mulej it-tama tiegħu.

Hu bħal siġra

mħawwla ħdejn nixxigħat ta' l-ilma

li tagħmel il-frott fi żmienha,

u l-weraq tagħha ma jidbielx;

hu jirnexxi f'kull ma jagħmel.

Hieni l-bniedem li jqiegħed fil-Mulej it-tama tiegħu.

Mhux hekk il-ħżiena, mhux hekk;

iżda huma bħal tibna li jtajjarha r-riħ.

Għalhekk il-ħżiena ma jifilħux għall-ħaqq,

ma joqogħdux il-ħatja fil-ġemgħat tat-tajbin.

Hieni l-bniedem li jqiegħed fil-Mulej it-tama tiegħu.

L-Evanġelju Luqa 12: 49-53

F'dak iz-zmien Gesu' qal lid-dixxipli tieghu: "Nar ġejt inqiegħed fuq l-art, u kemm nixtieq li diġà qabad! Iżda hemm magħmudija li biha għandi nitgħammed, u x'diqa għandi sa ma dan iseħħ! Taħsbu intom li jien ġejt inġib il-paċi fid-dinja? Le, ngħidilkom, imma l-firda; għax mil-lum 'il quddiem ħamsa minn nies f'dar waħda jkunu mifruda bejniethom, tlieta kontra tnejn u tnejn kontra tlieta; jinfirdu l-missier kontra l-iben u l-iben kontra l-missier, l-omm kontra l-bint u l-bint kontra l-omm, omm ir-raġel kontra mart binha u mart l-iben kontra omm żewġha.

L-Erbgħa 21 t’Ottubru

2009-10-21T00:30:00.000-07:00

L-Erbgħa 21 t’Ottubru L-Erbgħa tat-29 ġimgħa ta’ matul is-sena

L-Ewwel Qari Rumani 6: 12-18

Tħallux, mela, li d-dnub isaltan fuq dan il-ġisem tagħkom li jmut u toqogħdu għall-ġibdiet tiegħu; anqas ma għandkom tħallu l-membri ta' ġisimkom isiru għodda biex tagħmlu l-ħażen għas-servizz tad-dnub; imma offru ruħkom lil Alla bħala nies li reġgħu mill-mewt għall-ħajja ħalli l-membri ta' ġisimkom isiru għodda biex tagħmlu t-tajjeb għas-servizz ta' Alla għall-ġustizzja tagħkom. Għax lilkom id-dnub ma għandux jaħkimkom, ladarba m'intomx tgħixu taħt il-Liġi, imma taħt il-grazzja. X'nagħmlu, mela? Ladarba m'aħniex taħt il-Liġi imma taħt il-grazzja, allura għandna nidinbu? Ma jkun qatt! Ma tafux li jekk intom toffru ruħkom lil xi ħadd b'ilsiera biex tobduh, ta' min tobdu tkunu l-ilsiera, kemm jekk dan ikun id-dnub, li jwassal għall-mewt, u kemm jekk tkun l-ubbidjenza li twassal għall-ġustifikazzjoni? Imma niżżu ħajr lil Alla: intom kontu lsiera tad-dnub, imma issa obdejtu minn qalbkom dik il-kwalità ta' tagħlim li ngħatalkom biex timxu fuqu; nfdejtu minn taħt id-dnub, imma tjassartu għall-ġustizzja.

Salm Responsorjali Salm 124: 1b-3, 4-6, 7-8

L-għajnuna tagħna f'isem il-Mulej.

Li ma kienx il-Mulej magħna,

ħa jgħid hekk Iżrael li ma kienx il-Mulej magħna -

meta qamu għalina n-nies,

ħajjin kienu jibilgħuna,

meta nxtegħlu bl-għadab għalina.

L-għajnuna tagħna f'isem il-Mulej.

L-ilma kien jgħerriqna,

il-wied kien jgħaddi minn fuqna;

minn fuqna kien jgħaddi mewġ ta' l-ilma qawwi.

Mbierek il-Mulej, li ma telaqniex

priża għal snienhom.

L-għajnuna tagħna f'isem il-Mulej.

Ħajjitna bħal għasfur ħelset

mix-xbiek tan-nassaba.

Ix-xibka tqattgħet,

u aħna ħrabna.

L-għajnuna tagħna f'isem il-Mulej,

li għamel is-sema u l-art.

L-għajnuna tagħna f'isem il-Mulej.

L-Evanġelju Luqa 12: 39-48

F'ak iz-zmien, Gesu' qalilhom: "Kunu afu dan, li kieku sid id-dar kellu jkun jaf xħin ikun ġej il-ħalliel ma kienx se jħalli min jinfidlu l-ħajt ta' daru. Mela kunu lesti intom ukoll, għax qatt ma tistgħu tobsru s-siegħa li fiha jiġi Bin il-bniedem." "Mulej?" qallu Pietru," din il-parabbola qiegħed tgħidha għalina, jew għal kulħadd?" Wieġbu l-Mulej: "Int min tgħid li hu l-qaddej fidil u għaqli? Min hu dak li s-sid iqiegħdu fuq in-nies tad-dar biex jagħtihom sehemhom f'ħin l-ikel? Hieni dak il-qaddej li sidu jiġi u jsibu jagħmel dan. Ngħidilkom is-sewwa, li jafdalu ġidu kollu f'idejh. Imma nagħmlu mod li dak il-qaddej jibda jgħid f'qalbu, 'Sidi jiddawwar ma jiġi,' u jaqbad isawwat lill-qaddejja kollha, rġiel u nisa, u jiekol u jagħtiha għax-xorb u s-sokor; sid dak il-qaddej jasal f'jum meta ma jkunx jistennieh, f'siegħa li fiha jieħdu għal għarrieda, u jagħmlu bċejjeċ u jagħtih dak li ħaqqhom in-nies li m'humiex fidili. U dak il-qaddej li jkun jaf xi jrid sidu, u madankollu ma jħejjix jew ma jagħmilx li jrid sidu, swat kbir jaqla'. Min imbagħad, bla ma jkun jaf xi jrid sidu, jagħmel xi ħaġa li jkun ħaqqha s-swat, dan ftit jissawwat. Għax lil min tawh ħafna, ifittxu li jieħdu ħafna mingħandu; u min ħallewlu ħafna f'idejh, iżjed jippretendu mingħandu.

It-Tlieta 20 t’Ottubru

2009-10-20T00:28:00.000-07:00

It-Tlieta 20 t’Ottubru It-Tlieta tat-29 ġimgħa ta’ matul is-sena

L-Ewwel Qari Rumani 5: 12, 15b, 17-19, 20b-21

Għalhekk, bħalma kien permezz ta' bniedem wieħed li fid-dinja daħal id-dnub, u permezz tad-dnub il-mewt, u hekk il-mewt laħqet il-bnedmin kollha, għax kollha dinbu.Jekk permezz ta' ħtija waħda mietet il-kotra, aktar u aktar issa l-grazzja ta' Alla u d-don mogħti bil-grazzja ta' bniedem wieħed li hu Ġesù Kristu, xterdu bil-bosta fuq il-kotra. Għax jekk minħabba fil-ħtija ta' wieħed waħdu saltnet il-mewt, permezz ta' dak il-wieħed, aktar u aktar dawk li jirċievu l-kotra tal-grazzja u d-don tal-ġustizzja għad isaltnu fil-ħajja permezz ta' wieħed li hu Ġesù Kristu. Mela kif bil-ħtija ta' wieħed waħdu waslet il-kundanna fuq il-bnedmin kollha, hekk ukoll bl-opra tal-ġustizzja ta' wieħed waslet lill-bnedmin kollha l-ġustifikazzjoni tal-ħajja. Għax kif bid-diżubbidjenza ta' bniedem wieħed il-ħafna saru midinbin, hekk ukoll bl-ubbidjenza ta' wieħed il-ħafna jsiru ġusti. Fejn kotor id-dnub, kotrot fuq li kotrot il-grazzja. B'hekk, kif id-dnub saltan permezz tal-mewt, hekk issa l-grazzja ssaltan permezz tal-ġustizzja għall-ħajja ta' dejjem bis-saħħa ta' Ġesù Kristu Sidna.

Salm Responsorjali Salm 40: 7-8a, 8b-9, 10-17

Hawn jien, Mulej; ġej nagħmel ir-rieda tiegħek.

Int ma titgħaxxaqx b'sagrifiċċji u offerti;

imma widnejja inti ftaħtli;

ma tlabtnix vittmi tal-ħruq u tat-tpattija.

Mbagħad jien għedt: "Hawn jien, ġej. "

Hawn jien, Mulej; ġej nagħmel ir-rieda tiegħek.

Fil-bidu tal-ktieb hemm miktub fuqi

li nagħmel ir-rieda tiegħek.

Alla tiegħi, dan jogħġobni;

il-liġi tiegħek ġewwa qalbi.

Hawn jien, Mulej; ġej nagħmel ir-rieda tiegħek.

Xandart il-ġustizzja f'ġemgħa kbira;

xufftejja ma żammejthomx magħluqa. Mulej, dan inti tafu.

Hawn jien, Mulej; ġej nagħmel ir-rieda tiegħek.

Jithennew u jifirħu bik

dawk kollha li jfittxuk;

jgħidu dejjem: "Kbir il-Mulej?"

dawk li jħobbu s-salvazzjoni tiegħek.

Hawn jien, Mulej; ġej nagħmel ir-rieda tiegħek.

L-Evanġelju Luqa 12: 35-38

"Żommu ġenbejkom imħażżma u l-imsiebaħ tagħkom mixgħula; kunu bħal nies jistennew lil sidhom lura mill-festa tat-tieġ, biex malli jiġi u jħabbat jiftħulu minnufih. Henjin dawk il-qaddejja li meta jiġi sidhom isibhom jishru! Tassew ngħidilkom, li hu jitħażżem, iqegħedhom madwar il-mejda, u jgħaddi quddiemhom iservihom. U kieku kellu jiġi fil-ħin tat-tieni sahra, jew tat-tielet, u jsibhom xorta waħda fuq dmirhom, henjin huma!

It-Tnejn 19 t’Ottubru

2009-10-19T00:26:00.000-07:00

It-Tnejn 19 t’Ottubru San Ġwann de Brébeuf, Sant’ Iżakk Jogues, Saċerdoti u Sħabhom, Martri

L-Ewwel Qari Rumani 4: 20-25

Quddiem il-wegħda ta' Alla, Abraham ma qagħadx italla' u jniżżel jekk jemminx jew le, imma ssaħħaħ fil-fidi, filwaqt li gglorifika lil Alla u żamm bis-sħiħ li min kien għamillu l-wegħda kien qawwi biżżejjed biex iżomm kelmtu. U kien għalhekk li dan ġie "lilu magħdud b'ġustizzja?" Iżda l-kelmiet "ġie lilu magħdud?" ma nkitbux għalih biss, imma għad ikun magħdud ukoll lilna li nemmnu f'dak li qajjem mill-imwiet lil Ġesù Sidna, li kien mogħti għall-mewt għal dnubietna, u mqajjem għall-ġustifikazzjoni tagħna.

Salm Responsorjali Luqa 1: 69-70, 71-72, 73-75

Mbierek il-Mulej, Alla ta' Iżrael, għaliex ġie jżur u jifdi l-poplu tiegħu.

Gie jżur u jifdi l-poplu tiegħu biex jeħlishom,

Hu waqqaf għalina qawwa ta' salvazzjoni

f'dar David qaddej tiegħu.

Mbierek il-Mulej, Alla ta' Iżrael, għaliex ġie jżur u jifdi l-poplu tiegħu.

Bħalma wiegħed fl-imgħoddi b'fomm il-profeti qaddisin tiegħu,

biex isalvana mill-għedewwa tagħna,

u minn idejn dawk kollha li jobogħduna.

B'hekk juri ħniena ma' missirijietna

u jiftakar fil-patt qaddis tiegħu.

Mbierek il-Mulej, Alla ta' Iżrael, għaliex ġie jżur u jifdi l-poplu tiegħu.

Din kienet il-ħalfa li ħalef lil Abraham missierna:

li jagħtina l-grazzja li jeħlisna minn idejn l-għedewwa tagħna,

naqduh bla biża', tul ħajjitna kollha,

bil-ġustizzja u l-qdusija quddiemu ħajjitna kollha.

Mbierek il-Mulej, Alla ta' Iżrael, għaliex ġie jżur u jifdi l-poplu tiegħu.

L-Evanġelju Luqa 12: 13-21

Xi ħadd mill-folla qallu: "Mgħallem, għid lil ħija jaqsam il-wirt miegħi." "Ħabib?" wieġbu Ġesù, "min qegħedni mħallef fuqkom, jew qabbadni nqassmilkom il-ġid bejnietkom?" Mbagħad qal lin-nies: "Iftħu għajnejkom u ħarsu rwieħkom minn kull regħba, għax imqar jekk wieħed ikollu bir-radam, ħajtu ma tiddependix mill-ġid li jkollu." U qalilhom parabbola: "Wieħed raġel għani ġabar kotra ta' frott mir-raba' tiegħu. U beda jaħseb u jgħid bejnu u bejn ruħu, 'X'se nagħmel? Għax dan il-frott kollu ma għandix fejn naħżnu! Ara x'nagħmel,' qal, 'inħott l-imħażen li għandi u nibni oħrajn akbar, u naħżen fihom il-qamħ u l-ġid kollu li għandi. Mbagħad ngħid lili nnifsi: Ruħi, għandek ħażna kbira ta' ġid għal bosta snin; mela strieħ, kul, ixrob, ixxala?" Iżda qallu Alla, 'Iblah li int! Dan il-lejl stess jitolbuk ruħek lura. U l-ħwejjeġ li ħejjejt għalik, ta' min ikunu?' Hekk jiġrilu min jiġma' l-ġid għalih innifsu bla ma jistagħna quddiem Alla."

Il-Ħadd 18 t’Ottubru

2009-10-18T04:34:00.000-07:00

Il-Ħadd 18 t’Ottubru Id-29 Ħadd ta’ matul is-sena

L-Ewwel Qari Isaija 53: 10-11

Iżda l-Mulej għoġbu jgħakksu bil-mard. Talli joffri ruħu b'sagrifiċċju ta' riparazzjoni, huwa għad jara nisel u jtawwal jiemu; u r-rieda tal-Mulej isseħħ bih. Wara t-tbatija tiegħu għad jara d-dawl, jixba' bit-tagħrif tiegħu. Il-Ġust jiġġustifika lill-qaddej tiegħu quddiem il-kotra, u l-ħażen tagħhom jitgħabba bih hu.

Salm Responsorjali Salm 33:4-5. 18-19, 20, 22

Ħa tkun, Mulej, it-tjieba tiegħek fuqna, kif fik hi t-tama tagħna.

Għax sewwa hi l-kelma tal-Mulej,

kollox bil-fedeltà huwa għamel.

Hu jħobb id-dritt u s-sewwa;

bit-tjieba tal-Mulej mimlija l-art.

Ħa tkun, Mulej, it-tjieba tiegħek fuqna, kif fik hi t-tama tagħna.

Ara, għajnejn il-Mulej fuq dawk li jibżgħu minnu,

fuq dawk li jittamaw fit-tjieba tiegħu,

Biex jeħilsilhom mill-mewt ħajjithom,

u jaħjihom fi żmien il-ġuħ.

Ħa tkun, Mulej, it-tjieba tiegħek fuqna, kif fik hi t-tama tagħna.

Ruħna tixxennaq għall-Mulej,

hu l-għajnuna u t-tarka tagħna.

Ħa tkun, Mulej, it-tjieba tiegħek fuqna,

kif fik hi t-tama tagħna.

Ħa tkun, Mulej, it-tjieba tiegħek fuqna, kif fik hi t-tama tagħna.

It-Tieni Qari Lhud 4: 14-16

Mela meta aħna għandna l-qassis il-kbir, li hu tassew kbir, qassis li daħal fis-smewwiet, Ġesù, Bin Alla, ħa nżommu sħiħa l-fidi tagħna u nistqarruha. Għax aħna ma għandniex qassis il-kbir li ma jistax jagħder id-dgħufija tagħna, imma għandna wieħed li kien imġarrab bħalna f'kollox, minbarra d-dnub. Ħa nersqu, mela, b'qalbna qawwija lejn it-tron tal-grazzja, biex naqilgħu ħniena u nsibu f'waqtha l-grazzja li neħtieġu.

L-Evanġelju Mark 10: (35-45), 42-45

(Ġakbu u Ġwanni, ulied Żebedew, resqu lejh u qalulu: "Mgħallem, dak li se nitolbuk irriduk tagħtihulna." Xi triduni nagħmlilkom?" staqsiehom. U huma weġbuh: "Ħallina noqogħdu wieħed fuq il-lemin tiegħek u l-ieħor fuq ix-xellug fil-glorja tiegħek." Imma Ġesù qalilhom: "Ma tafux x'intom titolbu. Għandkom ħila tixorbu l-kalċi li se nixrob jien, u titgħammdu bil-magħmudija li biha se nitgħammed jien?" "Għandna?" qalulu. Mbagħad qalilhom Ġesù: "Il-kalċi li se nixrob jien tixorbuh, iva, u titgħammdu wkoll bil-magħmudija li biha se nitgħammed jien; imma li wieħed joqgħod fuq il-lemin jew fuq ix-xellug tiegħi, din m'hijiex ħaġa tiegħi li nagħtiha jien, imma hi għal dawk li għalihom kienet imħejjija." L-għaxra l-oħra, meta semgħu dan, saħnu għal Ġakbu u għal Ġwanni.)

Imma Ġesù sejjħilhom u qalilhom: "Tafu intom, dawk in-nies, li l-bnedmin jgħodduhom bħala kapijiet tal-pagani, jaħkmu fuqhom, u l-kbarat tagħhom iħaddmu s-setgħa tagħhom fuqhom. Fostkom ma għandux ikun hekk, imma min irid ikun kbir fostkom, għandu jkun qaddej tagħkom, u min irid ikun l-ewwel fostkom, għandu joqgħod ilsir ta' kulħadd. Għax hekk ukoll Bin il-bniedem, hu ma ġiex biex ikun moqdi, imma biex jaqdi u biex jagħti ħajtu b'fidwa għall-kotra."

Is-Sibt 17 t’Ottubru

2009-10-17T04:33:00.000-07:00

Is-Sibt 17 t’Ottubru Tifkira ta’ San Injazju ta’ Antjokja, isqof u martri

L-Ewwel Qari Rumani 4: 13, 16-18

Lil Abraham jew lin-nisel tiegħu l-wegħda li jirtu d-dinja ma saritilhomx permezz tal-Liġi, imma permezz tal-ġustizzja bil-fidi. Għalhekk il-wegħda hi marbuta mal-fidi, biex tkun mogħtija bħala grazzja, u hekk tibqa' sħiħa għal uliedu kollha, mhux biss dawk li jgħixu bil-Liġi, imma wkoll dawk li jgħixu bil-fidi ta' Abraham - il-missier tagħna lkoll, skond ma hemm miktub: "Jiena nagħmel minnek missier ta' kotra kbira ta' ġnu?" - missierna quddiem Alla li fih hu emmen, li jagħti l-ħajja lill-mejtin, u li jsejjaħ fl-eżistenza lil dak li ma jeżistix. Meta ma kellu ebda tama, Abraham ittama u emmen; u hekk sar missier ta' kotra kbira ta' ġnus, skond ma kien intqal lilu: "Hekk għad ikun in-nisel tiegħek."

Salm Responsorjali Salm 105:6-7, 8-9, 42-43

Jiftakar għal dejjem fil-patt tiegħu.

Nisel Abraham, il-qaddej tiegħu,

ulied Ġakobb, il-maħtur tiegħu,

Jaħweh hu Alla tagħna!

Ma' l-art kollha l-ġudizzji tiegħu!

Jiftakar għal dejjem fil-patt tiegħu.

Jiftakar għal dejjem fil-patt tiegħu,

fil-kelma li ta għal elf nisel,

fil-patt li għamel ma' Abraham,

fil-wegħda li ħalef lil Iżakk,

Jiftakar għal dejjem fil-patt tiegħu.

Għax ftakar fil-kelma qaddisa tiegħu

u f'Abraham, il-qaddej tiegħu.

U ħareġ bil-ferħ lill-poplu tiegħu,

b'għajat ta' ferħ lill-magħżulin tiegħu.

Jiftakar għal dejjem fil-patt tiegħu.

L-Evanġelju Luqa 12: 8-12

"U ngħidilkom li kull min jistqarr quddiem il-bnedmin li huwa miegħi, Bin il-bniedem ukoll jistqarr li huwa miegħu quddiem l-anġli ta' Alla. Iżda min jiċħad lili quddiem il-bnedmin, jien niċħad lilu quddiem l-anġli ta' Alla. U kull min jgħid xi ħaġa kontra Bin il-bniedem tinħafirlu; iżda min jieqaf lill-Ispirtu s-Santu ma jinħafirlux. Meta jeħdukom quddiem is-sinagogi u l-kapijiet u s-setgħat, toqogħdux tħabblu raskom kif sejrin twieġbu jew x'sejrin tgħidu, għax l-Ispirtu s-Santu jgħallimkom dak il-ħin stess x'għandkom tgħidu."

Il-Ġimgħa 16 t’Ottubru

2009-10-16T04:33:00.000-07:00

Il-Ġimgħa 16 t’Ottubru Il-Ġimgħa tat-28 ġimgħa ta’ matul is-sena

L-Ewwel Qari Rumani 4: 1-8

Xi ngħidu, mela, li sab Abraham, il-missier tagħna skond il-ġisem? Li kieku Abraham kien iġġustifikat bis-saħħa ta' l-opri, kien ikollu biex jiftaħar; imma mhux quddiem Alla! Għax xi tgħid l-Iskrittura? Tgħid li"Abraham emmen lil Alla u kien magħdud lilu b'ġustizzj?" Il-ħlas lil min jaħdem ma jingħaddlux bi pjaċir, imma b'dejn; iżda min bla ma jagħmel opri, jemmen lil Alla li jiġġustifika lil min hu ħażin, din il-fidi tiegħu tingħaddlu b'ġustizzja. Hekk wkoll David jgħid kemm hu hieni l-bniedem li Alla jqisu b'ġust mingħajr l-opri: "Hienja dawk li dnubiethom maħfura, u li ħtijiethom mgħottija. Hieni l-bniedem li l-Mulej ma jgħoddlu ebda dnub."

Salm Responsorjali Salm 32:1b-2, 5, 11

Int kenn għalija, mit-taħbit tħarisni, iddawwarni u tferraħni bil-ħelsien tiegħek.

Hieni l-bniedem li ħtijietu maħfura,

li għandu d-dnub tiegħu mistur!

Hieni l-bniedem li ebda ħażen ma jgħoddlu l-Mulej,

u ma għandu ebda qerq f'qalbu!

Int kenn għalija, mit-taħbit tħarisni, iddawwarni u tferraħni bil-ħelsien tiegħek.

Id-dnub tiegħi jien stqarrejtlek,

u l-ħażen tiegħi ma ħbejtulekx.

Jien għedt: "Quddiem il-Mulej nistqarr ħtijieti."

U int ħfirtli l-ħażen tad-dnub tiegħi.

Int kenn għalija, mit-taħbit tħarisni, iddawwarni u tferraħni bil-ħelsien tiegħek.

Ifirħu, twajbin, u thennew fil-Mulej;

għajjtu bil-ferħ, intom ilkoll ta' qalbkom safja.

Int kenn għalija, mit-taħbit tħarisni, iddawwarni u tferraħni bil-ħelsien tiegħek.

L-Evanġelju Luqa 12: 1-7

Sadattant in-nies bdiet tinġabar bl- eluf, kulħadd jgħaffeġ fuq xulxin. U hu qabad jgħid l-ewwelnett lid-dixxipli tiegħu: "Ilqgħu rwieħkom mill-ħmira tal-Fariżej, jiġifieri mill-wiċċ b'ieħor tagħhom. Xejn ma hu mgħotti li ma jinkixifx, u xejn ma hu moħbi li ma jsirx magħruf. Għalhekk, kull ma tkunu għedtu fid-dlam għad jinstama' fid-dawl, u kull ma tkunu tkellimtu fil-widnejn, fil-kmamar ta' ġewwa, għad jixxandar minn fuq il-bjut. "Dan ngħidilkom, ħbieb tiegħi, tibżgħux minn dawk li joqtlu l-ġisem u mbagħad ma jkunu jistgħu jagħmlu xejn iżjed. Ħa nurikom jien minn min għandkom tibżgħu; ibżgħu minn Dak li, wara li jkun qatlek, għandu s-setgħa jixħtek ġo l-infern. Iva, ngħidilkom, minn dan ibżgħu. Ħames għasafar tal-bejt mhux żewġ soldi jinbiegħu? U anqas wieħed minnhom ma hu minsi quddiem Alla. U intom, sa x-xagħar ta' raskom, kollu magħdud. Xejn la tibżgħu, għax intom aktar minn ħafna għasafar tal-bejt tiswew.

Il-Ħamis 15 t’Ottubru

2009-10-15T04:32:00.000-07:00

Il-Ħamis 15 t’Ottubru Il-Ħamis tat-28 ġimgħa ta’ matul is-sena

L-Ewwel Qari Rumani 3: 21-30

Issa l-ġustizzja ta' Alla dehret mingħajr il-Liġi, għad li l-Liġi u l-profeti jixhdu għaliha. U din hi l-ġustizzja ta' Alla u li Alla jagħti permezz tal-fidi f'Ġesù Kristu lil dawk li jemmnu, bla ma jagħżel bejniethom. Il-bnedmin kollha dinbu u ċċaħħdu mill-glorja ta' Alla; għalhekk issa huma jkunu ġġustifikati bil-grazzja tiegħu li jagħtihom minn rajh permezz tal-fidwa li hemm fi Kristu Ġesù. Lilu Alla qiegħdu sagrifiċċju ta' tpattija għall-maħfra tad-dnubiet għal dawk li jemmnu bih. U dan bis-saħħa ta' demmu. B'hekk Alla issa juri l-ġustizzja tiegħu, waqt li fl-imgħoddi għalaq għajnejh għad-dnubiet li saru fi żmien li kien jistabar bihom. Ried, iva, juri l-ġustizzja tiegħu f'dan iż-żmien ħalli juri li hu ġust u jiġġustifika wkoll lil min jemmen f'Ġesù. Biex, mela, jista' wieħed jiftaħar? Ma hemmx biex. U bis-saħħa ta' liema liġi? Ta' l-opri? Le, iżda bis-saħħa tal-liġi tal-fidi. Għax aħna għandna fehma sħiħa li l-bniedem ikun iġġustifikat permezz tal-fidi mingħajr l-opri tal-Liġi. Forsi Alla hu Alla tal-Lhud biss? Mhux tal-pagani wkoll? Iva, tal-pagani wkoll: Alla hu wieħed, u hu l-istess wieħed li jiġġustifika permezz tal-fidi l-Lhudi ċirkonċiż u l-pagan mhux ċirkonċiż.

Salm Responsorjali Salm 130:1b-2, 3-4, 5-6ab

Għax għand il-Mulej hemm it-tjieba, u l-fidwa għandu bil-kotra.

Minn qiegħ l-art insejjaħlek, Mulej:

isma', Sidi, il-leħen tiegħi!

Ħa jkunu widnejk miftuħa,

jiena u nitolbok bil-ħniena.

Għax għand il-Mulej hemm it-tjieba, u l-fidwa għandu bil-kotra.

Jekk tal-ħtijiet int tagħti kas, Mulej, Sidi,

min jista' jżomm sħiħ?

Imma għandek hemm il-maħfra,

biex hekk inqimuk fil-biża' tiegħek.

Għax għand il-Mulej hemm it-tjieba, u l-fidwa għandu bil-kotra.

Jien lill-Mulej nistenna,

ruħi f'kelmtu tittama.

Tistenna ruħi lil Sidi,

aktar milli l-għassiesa s-sebħ.

Għax għand il-Mulej hemm it-tjieba, u l-fidwa għandu bil-kotra.

L-Evanġelju Luqa 11: 47-54

Ħażin għalikom! Intom tibnu l-oqbra tal-profeti li qatlu missirijietkom, u b'hekk tagħtu xhieda ta' kull ma għamlu missirijietkom u turu li taqblu magħhom, għax huma qatluhom u intom tibnulhom l-oqbra. Kien għalhekk li l-Għerf ta' Alla qal, 'Jien nibagħtilhom profeti u appostli, u huma joqtlu u jippersegwitaw lil xi wħud minnhom.' U hekk dan in-nisel ikollu jagħti kont ta' demm il-profeti kollha li nxtered sa mill-ħolqien tad-dinja, ibda mid-demm ta' Abel sad-demm ta' Żakkarija, li qerduh bejn l-altar u s-santwarju. Iva, ngħidilkom, dan in-nisel ikollu jagħti kont! Ħażin għalikom intom l-għorrief tal-Liġi! Intom ħtaftu l-muftieħ ta' l-għerf, biex mbagħad intom stess ma dħaltux u żammejtu lura lil min ried jidħol?" Meta Ġesù ħareġ minn hemm, il-kittieba u l-Fariżej bdew irossuh kemm jifilħu b'mistoqsijiet fuq ħafna ħwejjeġ u jonsbuh biex jaraw jaqbdux xi ħaġa minn fommu.

L-Erbgha 14 t'Ottubru

2009-10-14T04:31:00.000-07:00

L-Erbgħa 14 t’Ottubru L-Erbgħa tat-28 ġimgħa ta’ matul is-sena

L-Ewwel Qari Rumani 2: 1-11

Int, ja bniedem, li tagħmel ħaqq minn ħaddieħor ma għandek ebda skuża, int min int. Għax int u tagħmel ħaqq minn ħaddieħor tkun tikkundanna lilek innifsek, ladarba int u tagħmel il-ħaqq tkun tagħmel l-istess. Imma aħna nafu li dawk li jagħmlu ħwejjeġ bħal dawn, Alla jagħmel ħaqq minnhom skond il-verità. U taħseb int, ja bniedem, li tagħmel ħaqq minn ħaddieħor li jagħmel dawn il-ħwejjeġ, u tagħmilhom int ukoll; taħseb int, li sejjer taħrab il-ġudizzju ta' Alla? Jew trid tabbuża mill-kobor tat-tjubija tiegħu, mis-sabar u l-ġenerożità tiegħu? Ma tafx li b'din il-ħniena tiegħu Alla jrid iwasslek għall-indiema? B'din l-ebusija ta' rasek u n-nuqqas ta' ndiema f'qalbek, inti qiegħed tiġma' għalik innifsek il-korla, għal jum il-korla, meta Alla għad jirrivela l-ġudizzju rett tiegħu, u jħallas lil kulħadd skond ma jkun għamel: jagħti l-ħajja ta' dejjem lil dawk li jipperseveraw sa l-aħħar fl-għemil it-tajjeb, u jkunu fittxew il-glorja u l-ġieħ u l-ħajja li ma tintemmx, imma jerfa' l-korla u l-qilla għal dawk li ma jridu jisimgħu b'xejn, u jirvellaw kontra l-verità biex imbagħad joqogħdu għall-ħażen. Tbatija u dwejjaq għal kull ruħ ta' bniedem li jagħmel il-ħażen, l-ewwel għal-Lhud, u mbagħad għall-Griegi; glorja u ġieħ u sliem għal kull min jagħmel it-tajjeb, l-ewwel għal-Lhud, u mbagħad għall-Griegi. Għax Alla ma jħarisx lejn l-uċuħ!

Salm Responsorjali Salm 62:2-3, 6-7, 9

Mulej, int tagħti 'l kulħadd skond għemilu.

F'Alla biss il-mistrieħ ta' ruħi:

mingħandu tiġini s-salvazzjoni.

Hu biss il-blata u s-salvazzjoni tiegħi,

hu l-kenn tiegħi; xejn ma jċaqlaqni.

Mulej, int tagħti 'l kulħadd skond għemilu.

F'Alla biss il-mistrieħ ta' ruħi,

għax mingħandu tiġini t-tama.

Hu biss il-blata u s-salvazzjoni tiegħi,

hu l-kenn tiegħi; xejn ma jċaqlaqni.

Mulej, int tagħti 'l kulħadd skond għemilu.

Ittama fih f'kull żmien, o poplu;

iftħu qalbkom quddiemu.

Alla hu kenn għalina!

Mulej, int tagħti 'l kulħadd skond għemilu.

L-Evanġelju Luqa 11: 42-46

Imma ħażin għalikom intom il-Fariżej! Intom tħallsu d-dieċmi fuq in-nagħniegħ u l-fejġel u fuq kull xorta ta' ħxejjex, u mbagħad għal dik li hi ġustizzja u mħabba ta' Alla tħallu kollox għaddej. Dawn kien imisskom tħarsu, mingħajr ma tħallu l-oħrajn barra. Ħażin għalikom intom il-Fariżej! Intom tħobbu s-siġġijiet ta' quddiem fis-sinagogi u min isellmilkom fil-pjazez. Ħażin għalikom! Qiskom l-oqbra, li ma tagħrafhomx, u n-nies tgħaddi minn fuqhom bla ma tintebaħ bihom." Qabeż wieħed mill-għorrief tal-Liġi u qallu: "Mgħallem, b'dan li qiegħed tgħid qiegħed tgħajjar lilna wkoll?" Qallu Ġesù: "Ħażin għalikom ukoll intom l-għorrief tal-Liġi! Intom tgħabbu n-nies b'tagħbijiet li bilkemm wieħed jiflaħhom u li intom stess anqas b'saba' wieħed ma tmissuhom.

It-Tlieta 13 t'Ottubru

2009-10-13T04:29:00.000-07:00

It-Tlieta 13 t’Ottubru It-Tlieta tat-28 ġimgħa ta’ matul is-sena

L-Ewwel Qari Rumani 1: 16-25

Jiena ma nistħix mill-Evanġelju; għax l-Evanġelju hu qawwa ta' Alla għas-salvazzjoni ta' dawk kollha li jemmnu, l-ewwel il-Lhud u mbagħad il-Griegi, u fih tidher il-ġustizzja ta' Alla minn fidi għal fidi, skond ma hemm miktub: "Il-ġust jgħix bil-fidi." Il-korla ta' Alla tidher nieżla mis-sema fuq il-ħażen u l-inġustizzja tal-bnedmin li jżommu l-verità mjassra bl-inġustizzja; għax dak li wieħed jista' jagħraf minn Alla kien, iva, irrivelat lilhom; Alla stess urihulhom. Il-kobor tiegħu li ma jidhirx, jiġifieri s-setgħa tiegħu ta' dejjem, u d-divinità tiegħu, huma setgħu jagħrfuh sa mill-ħolqien tad-dinja, permezz tal-ħlejjaq, u għalhekk ma għandhom ebda skuża. Imma għad li lil Alla għarfuh, huma la tawh ġieħ ta' Alla li hu, u lanqas raddewlu ħajr; għall-kuntrarju, moħħhom intilef fil-bluha, u qalbhom bla dehen iddallmet; waqt li riedu jagħmluha ta' għorrief, bliehu u bidlu l-glorja ta' dak Alla li ma jintemmx ma' sura u xbieha tal-bniedem li jintemm, ta' l-għasafar, tal-bhejjem b'erba' saqajn, tas-sriep. U għalhekk Alla rħiehom għall-ġibdiet ħżiena ta' qalbhom, biex niġġsu u waqqgħu fl-għajb lil ġisimhom stess bejniethom. Il-verità ta' Alla bidluha ma' gidba, u taw il-ġieħ u l-qima tagħhom lill-ħlejjaq flok ma tawhom lill-Ħallieq, li jkun imbierek għal dejjem. Amen.

Salm Responsorjali Salm 19:2-3, 4-5

Is-smewwiet ixandru l-glorja ta' Alla.

Is-smewwiet ixandru l-glorja ta' Alla,

għemil idejh tħabbar il-firxa tas-sema.

Jum lil ieħor jagħti l-aħbar,

lejl lil ieħor iwassal it-tagħrif.

Is-smewwiet ixandru l-glorja ta' Alla.

Ma hemmx aħbar u anqas kliem,

ma hemmx leħen li ma jinstemax.

Ma' l-art kollha jasal leħenhom,

mad-dinja kollha jixtered kliemhom.

Is-smewwiet ixandru l-glorja ta' Alla.

L-Evanġelju Luqa 11: 37-41

Huwa u jitkellem, wieħed Fariżew stiednu għandu għall-ikel. Daħal għandu u qagħad bilqiegħda. Imma l-Fariżew stagħġeb meta ra li qabel xejn ma nħasilx skond ir-riti ta' qabel l-ikel. U l-Mulej qallu: "U issa intom il-Fariżej! Intom tnaddfu t-tazza u l-platt minn barra, iżda minn ġewwa intom mimlija bis-serq u l-ħażen. Kemm intom bla moħħ! Min għamel in-naħa ta' barra, ma għamilx ukoll in-naħa ta' ġewwa? Mela agħtu karità minn dak li hemm ġewwa, u taraw kif kollox ikunilkom nadif.

It-Tnejn 12 t'Ottubru

2009-10-12T04:27:00.000-07:00

It-Tnejn 12 t’Ottubru It-Tnejn tat-28 ġimgħa ta’ matul is-sena

L-Ewwel Qari Rumani 1: 1-7

Pawlu, qaddej ta' Kristu Ġesù, msejjaħ biex ikun appostlu, maħtur għall-Evanġelju ta' Alla. Dan hu l-Evanġelju li Alla kien wiegħed permezz tal-profeti fil-Kotba Mqaddsa dwar Ibnu Ġesù Kristu Sidna li, skond it-tnissil tal-ġisem, twieled min-nisel ta' David, u, skond l-Ispirtu s-Santu, ġie rivelat bħala l-Iben ta' Alla b'kull qawwa permezz tal-qawmien mill-imwiet. Bih aħna rċevejna l-grazzja ta' l-appostolat biex inwasslu għall-ubbidjenza tal-fidi l-bnedmin fost il-ġnus kollha għall-ġieħ ta' ismu. Fosthom tinsabu intom ukoll, msejjħin biex tkunu ta' Ġesù Kristu; lill-maħbubin kollha ta' Alla li jinsabu Ruma msejjħin biex ikunu qaddisin: grazzja lilkom u sliem mingħand Alla Missierna u Sidna Ġesù Kristu.

Salm Responsorjali Salm 98:1bcde, 2-3ab, 3cd-4

Għarraf il-Mulej is-salvazzjoni tiegħu.

Għannu lill-Mulej għanja ġdida,

għax għamel ħwejjeġ ta' l-għaġeb.

Ġibitlu r-rebħa l-leminija tiegħu,

u d-driegħ imqaddes tiegħu.

Għarraf il-Mulej is-salvazzjoni tiegħu.

Għarraf il-Mulej is-salvazzjoni tiegħu,

f'għajnejn il-ġnus wera l-ġustizzja tiegħu.

Ftakar fit-tjieba u l-fedeltà tiegħu

mal-poplu ta' Iżrael.

Għarraf il-Mulej is-salvazzjoni tiegħu.

L-art kollha, minn tarf għall-ieħor,

rat is-salvazzjoni ta' Alla tagħna.

Għajjtu bil-ferħ lill-Mulej fl-art kollha,

infexxu fil-hena, ifirħu u għannu!

Għarraf il-Mulej is-salvazzjoni tiegħu.

L-Evanġelju Luqa 11: 29-32

Meta l-folla tan-nies żdiedet, Ġesù qabad u qal: "Nisel ħażin huwa dan in-nisel! Irid sinjal! Imma ebda sinjal ma jingħatalu ħlief is-sinjal ta' Ġona. Għax bħalma Ġona sar sinjal għan-nies ta' Ninwè, hekk isir Bin il-bniedem għal dan in-nisel. F'jum il-ħaqq, is-sultana tan-nofsinhar għad tqum man-nies ta' dan in-nisel u tikkundannahom, għax hi ġiet mit-truf ta' l-art biex tisma' l-għerf ta' Salamun; u araw li hawnhekk hawn min hu aqwa minn Salamun! F'jum il-ħaqq, in-nies ta' Ninwè għad iqumu ma' dan in-nisel u jikkundannawh, għax huma nidmu wara l-predikazzjoni ta' Ġona; u araw li hawnhekk hawn min hu aqwa minn Ġona!

Il-Ħadd 11 t’Ottubru

2009-10-11T22:31:00.000-07:00

Il-Ħadd 11 t’Ottubru It-28 Ħadd ta’ matul is-sena

L-Ewwel Qari Għerf 7: 7-11

Għalhekk jien tlabt u qlajt l-għaqal; sejjaħt, u ġie fuqi l-ispirtu ta' l-għerf. Dan l-għerf qistu aqwa minn kull xettru u tron, u ntbaħt li l-għana m'hu xejn ħdejh. Ma xebbahtx miegħu l-ħaġra l-aktar prezzjuża, għax id-deheb kollu ħdejh m'huwiex ħlief ftit ramel, u l-fidda quddiemu qisha ftit tajn. Aktar mis-saħħa u s-sbuħija ħabbejtu, u għoġobni aktar mid-dawl; għax id-dija tiegħu ma tgħib qatt. Ma' l-għerf ġieni l-ġid kollu, u miegħu ġiebli għana bla qjies

Salm Responsorjali Salm 90:12-13, 14-15, 16-17

Imliena bit-tjieba tiegħek, Mulej, biex nifirħu u nithennew ħajjitna kollha.

Għallimna ngħoddu jiem ħajjitna,

sabiex aħna nimxu bil-għaqal.

Dur lejna, Mulej! Kemm se ddum?

Ħenn għall-qaddejja tiegħek.

Imliena bit-tjieba tiegħek, Mulej, biex nifirħu u nithennew ħajjitna kollha.

Imliena kmieni bit-tjieba tiegħek,

biex nifirħu u nithennew ħajjitna kollha.

Ferraħna daqs kemm għakkistna,

għas-snin li fihom rajna l-ħsara.

Imliena bit-tjieba tiegħek, Mulej, biex nifirħu u nithennew ħajjitna kollha.

Ħa jidher għemilek quddiem il-qaddejja tiegħek,

u l-kobor tiegħek quddiem uliedhom.

Ħa tkun fuqna l-grazzja ta' Alla Sidna!

Wettqilna inti x-xogħol ta' idejna,

wettaq, iva, xogħol idejna.

Imliena bit-tjieba tiegħek, Mulej, biex nifirħu u nithennew ħajjitna kollha.

It-Tieni Qari Lhud 4: 12-13

Il-kelma ta' Alla hi ħajja u qawwija, taqta' aktar minn xabla b'żewġt ixfar; hija tinfed sa tifred minn xulxin ir-ruħ u l-ispirtu u l-ġogi u l-mudullun; u tgħarbel il-ħsibijiet u l-fehmiet tal-qalb. Xejn ma hemm fil-ħolqien li hu moħbi għalih, imma kollox hu miftuħ għal għajnejn Alla, li lilu rridu nagħtu kont.

L-Evanġelju Mark 10: 17-27, (28-30)

Kien se jaqbad it-triq, meta mar fuqu wieħed jgħaġġel, niżel għarkubbtejh quddiemu u qallu: "Mgħallem tajjeb, x'għandi nagħmel biex nikseb il-ħajja ta' dejjem?" "Għaliex qiegħed issejjaħli 'tajjeb'?" qallu Ġesù,"ħadd ma hu tajjeb ħlief Alla biss. Inti l-kmandamenti tafhom: la toqtolx, la tiżnix, la tisraqx, la tixhidx fil-falz, la tiħux bil-qerq dak li hu ta' ħaddieħor; weġġaħ lil missierek u 'l ommok." U dak wieġbu u qallu: "Mgħallem, jiena dan kollu ili nħarsu minn żgħożiti." Mbagħad Ġesù xeħet fuqu ħarsa ta' mħabba u qallu: "Ħaġa waħda tonqsok: mur bigħ li għandek, agħtih lill-fqar, u jkollok teżor fis-sema; mbagħad ejja u imxi warajja." Imma għal dan il-kliem ir-raġel qarras wiċċu u telaq b'qalbu sewda, għaliex kellu bosta ġid. Ġesù mbagħad ħares ħarsa madwaru u qal lid-dixxipli tiegħu: "Kemm hi iebsa għall-għonja li jidħlu fis-Saltna ta' Alla! Id-dixxipli stagħġbu għal din il-kelma, imma Ġesù raġa' qalilhom: "Kemm hi iebsa, uliedi, li wieħed jidħol fis-Saltna ta' Alla! Eħfef li ġemel jgħaddi minn għajn ta' labra milli wieħed għani jidħol fis-Saltna ta' Alla?" Huma stagħġbu wisq aktar, u bdew jgħidu wieħed lil ieħor: "Mela min jista' jsalva?" Ġesù ħares lejhom u qalilhom: "Għall-bnedmin dan ma jistax ikun, imma għal Alla iva; għax għal Alla kollox jista' jkun."

(Qabeż Pietru u qallu: "Tajjeb! Aħna ħallejna kollox u ġejna warajk." Qallu Ġesù: "Tassew ngħidilkom, li fost dawk kollha li minħabba fija u l-Evanġelju jħallu lil darhom jew lil ħuthom jew lil ommhom jew lil missierhom jew lil uliedhom jew l-għelieqi tagħhom, ma hemm ħadd fosthom li minn issa, f'din id-dinja stess, ma jirċevix, għal mitt darba iktar, djar, aħwa, subjien u bniet, ommijiet, ulied u għelieqi flimkien ma' persekuzzjonijiet, u l-ħajja ta' dejjem fiż-żmien li ġej.)

Is-Sibt 10 t’Ottubru

2009-10-10T22:27:00.000-07:00

Is-Sibt 10 t’Ottubru Is-Sibt tas-27 ġimgħa ta’ matul is-sena

L-Ewwel Qari Ġoel 4, 12-21

Ħa jitqanqlu l-ġnus u jmorru fil-Wied ta' Ġosafat! Għax hemm se noqgħod biex nagħmel ħaqq mill-ġnus kollha ta' madwar. Ressqu l-minġel; għax laħaq il-ħsad! Ejjew, isħqu b'riġlejkom, għax mimli l-magħsar; il-btieti mfawwrin, għax kbira ħżunithom! Rassa bla qjies f'wied is-sentenza! Għax Jum il-Mulej fil-qrib f'wied is-sentenza. Ix-xemx u l-qamar jiddallmu, u l-kwiekeb jitilfu dijiethom. Il-Mulej iriegħed minn Sijon, isamma' leħnu minn Ġerusalemm; u s-smewwiet u l-art jitriegħdu! Iżda l-Mulej ikun għall-poplu tiegħu kenn, ikun fortizza għal ulied Iżrael! "Mbagħad tagħrfu li jien il-Mulej, Alla tagħkom, li ngħammar f'Sijon, il-muntanja mqaddsa tiegħi! Ġerusalemm tkun post qaddis, qatt iżjed ma jgħaddu minnha l-barranin! U jiġri dakinhar, il-muntanji jqattru l-inbid ġdid, l-għoljiet inixxu l-ħalib, u l-widien kollha ta' Ġuda ifuru bl-ilmijiet. U minn dar il-Mulej tnixxi għajn Li ssaqqi Wied Sittim. L-Eġittu jsir ħerba waħda, Edom jinbidel f'deżert li jbikki, minħabba fil-moħqrija li wrew ma' wlied Ġuda meta xerrdu demmhom bla ħtija f'arthom. Imma art Ġuda tkum mgħammra għal dejjem, u Ġerusalemm għal dejjem ta' dejjem. U nitħallas minn demmhom li s'issa għadni ma tħallastx minnu u l-Mulej jgħammar f'Sijon."

Salm Responsorjali Salm 97:1-2, 5-6, 11-12

Ifirħu, ġusti, fil-Mulej.

Il-Mulej isaltan! Ħa taqbeż l-art bil-ferħ,

u jifirħu l-ħafna gżejjer!

Sħab u dlam hemm madwaru;

is-sewwa u l-ħaqq is-sisien tat-tron tiegħu.

Ifirħu, ġusti, fil-Mulej.

Bħax-xama' jdubu l-muntanji quddiem il-Mulej,

quddiem is-Sid ta' l-art kollha.

Ixandru s-smewwiet il-ġustizzja tiegħu;

jaraw il-popli kollha s-sebħ tiegħu.

Ifirħu, ġusti, fil-Mulej.

Ifeġġ id-dawl fuq il-ġust,

u l-hena għal qalb in-nies sewwa.

Ifirħu, ġusti, fil-Mulej,

u faħħru l-isem qaddis tiegħu.

Ifirħu, ġusti, fil-Mulej.

L-Evanġelju Luqa 11, 27-28

Huwa u jgħid dan, kien hemm waħda mara li għolliet leħinha minn qalb il-folla u qaltlu: "Hieni l-ġuf li ġiebek u s-sider li rdajt?" Iżda hu qalilha: "Imma tassew ngħidlek, aktar hienja dawk li jisimgħu l-kelma ta' Alla u jħarsuha?"

U aħfrilna dnubietna, għax aħna wkoll naħfru lil kull min hu ħati għalina, u la ddaħħalniex fit-tiġrib.'?"

Il-Ġimgħa 9 t'Ottubru

2009-10-09T02:58:00.000-07:00

Il-Ġimgħa 9 t'Ottubru Il-Ġimgħa tas-27 ġimgħa ta’ matul il-ġimgħa

L-Ewwel Qari Ġoel 1, 13-15; 2:1-2

Ilbsu x-xkejjer, qassisin, u olfqu, ixhru, qaddejja ta' l-artal! Ejjew, orqdu bl-ixkejjer fuqkom, qaddejja ta' Alla tiegħi! Għax miżmuma mid-dar ta' Alla tagħkom l-offerta ta' l-ikel u tax-xorb. Ordnaw sawma; sejjħu laqgħa mqaddsa; morru iġbru x-xjuħ, u n-nies kollha tal-pajjiż fid-dar tal-Mulej Alla tagħkom. Għajjtu lill-Mulej: "Ah, x'jum dan! Għax fil-qrib jum il-Mulej, jasal bħal riefnu mingħand Xaddaj."

Doqqu t-tromba f'Sijon, semmgħu l-aħbar minn fuq il-muntanja mqaddsa tiegħi! Ħa jitriegħdu dawk kollha li jgħammru fil-pajjiż, għax Jum il-Mulej wasal, għax hu fil-qrib! Jum ta' dlam u ta' swied, jum ta' sħab u ta' ċpar magħqud. Fuq il-muntanji jinfirex bħal sħaba sewda poplu kotran u qawwi, li bħalu ma kien hemm qatt fl-imgħoddi, lanqas ma jkun hemm warajh saż-żminijiet l-aktar imbiegħda.

Salm Responsorjali Salm 9, 2-3; 6; 16; 8-9

Il-Mulej jagħmel ħaqq mid-dinja bil-ġustizzja

Infaħħrek, Mulej, b'qalbi kollha;

nxandar għeġubijietek kollha!

Nifraħ u nithenna bik;

ngħanni lil ismek, int Alla l-għoli.

Il-Mulej jagħmel ħaqq mid-dinja bil-ġustizzja

Ċanfart il-ġnus u qridt il-ħżiena;

ħassart isimhom għal dejjem ta' dejjem.

Waqgħu l-ġnus fil-ħofra li ħaffru;

fix-xibka li ħbew inqabad riġilhom.

Il-Mulej jagħmel ħaqq mid-dinja bil-ġustizzja

Imma l-Mulej isaltan għal dejjem,

iwaqqaf għall-ħaqq it-tron tiegħu.

Hu jagħmel ħaqq mid-dinja bil-ġustizzja,

jiġġudika l-popli bis-sewwa.

Il-Mulej jagħmel ħaqq mid-dinja bil-ġustizzja

L-Evanġelju Luqa 11;15-26

Ġesù kien qiegħed ikeċċi xitan iżda xi wħud minnhom qalu: "Bis-saħħa ta' Begħelżebul, il-prinċep tax-xjaten, qiegħed ikeċċihom ix-xjaten." Oħrajn, biex iġarrbuh, riedu mingħandu sinjal mis-sema. Iżda hu ntebaħ x'kienet il-fehma tagħhom, u qalilhom: "Kull saltna maqsuma fiha nfisha ssir ħerba, u taqa' dar fuq oħra. Jekk ix-Xitan ukoll hu kontra tiegħu nnifsu, kif se żżomm wieqfa s-saltna tiegħu? Għax intom tgħidu li jien bis-saħħa ta' Begħelżebul inkeċċihom ix-xjaten. Imma jekk jiena qiegħed inkeċċi x-xjaten bis-saħħa ta' Begħelżebul, uliedkom bis-saħħa ta' min ikeċċuhom? Għalhekk huma stess ikunu l-imħallfin tagħkom. Iżda jekk jiena qiegħed inkeċċi x-xjaten bis-saħħa ta' Alla, dan ifisser li waslitilkom is-Saltna ta' Alla. Sakemm il-bniedem qawwi u armat tajjeb jgħasses il-palazz tiegħu, ħwejġu jkunu fiż-żgur. Imma jekk wieħed aqwa minnu jaqbeż fuqu u jegħlbu, jaħtaflu l-armi kollha li fuqhom kien iserraħ rasu, u jqassam il-priża tiegħu. Min m'huwiex miegħi huwa kontra tiegħi, u min ma jiġborx miegħi, ixerred.

"Meta l-ispirtu mniġġes joħroġ minn bniedem, huwa jmur jiġġerra u jfittex il-mistrieħ f'art niexfa, u billi ma jsibu mkien, jgħid, 'Mela nerġa' lura lejn dari mnejn ħriġt.' U x'ħin jiġi, isibha miknusa u kollox f'postu. Mbagħad imur iġib seba' spirti oħra agħar minnu, u jidħlu joqogħdu hemm ġew. U fl-aħħar dak il-bniedem isib ruħu f'qagħda agħar minn ta' qabel."

Il-Ħamis 8 t’Ottubru

2009-10-08T02:36:00.000-07:00

Il-Ħamis 8 t’Ottubru Il-Ħamis tas-27 ġimgħa ta’ matul il-ġimgħa

L-Ewwel Qari Malakija 3, 13-20b

"Iebes għalija kliemkom?" jgħid il-Mulej."Imma intom tgħidu, 'X'għedna kontrik?’ Intom tgħidu: 'Hu għal xejn li taqdi lil Alla! U x'jiswa jekk ħarisna t-twissijiet tiegħu u jekk imxejna b'qalb imnikkta quddiem il-Mulej ta' l-eżerċti? Mela issa ħa nsejjħulhom aħna hienja n-nies kburin; dawk kollha li jagħmlu l-ħażen mhux biss imurilhom kollox bir-riżq, imma wkoll meta jġarrbu 'l Alla jeħilsuha ħafif!'?" Hekk qalu wieħed lil ieħor dawk li jibżgħu mill-Mulej; u l-Mulej ta widen u sama'; u nkiteb quddiemu ktieb it-tifkiriet minħabba f'dawk li jibżgħu minnu u dawk li jafdaw f'Ismu. "U fil-jum imħejji minni?" jgħid il-Mulej ta' l-eżerċti,"huma jkunu għalija teżor li ma bħalu, u nagħdirhom kif raġel jagħder lil ibnu li jaqdih." Mbagħad mill-ġdid tagħrfu tagħżlu bejn il-ġust u l-ħażin, bejn min jaqdi 'l Alla u min ma jaqdihx. "Għax, ara, jiġi l-Jum, jaqbad qisu forn, u l-kburin kollha u dawk kollha li jagħmlu l-ħażen ikunu tiben, u l-jum li ġej għad jaħraqhom?" jgħid il-Mulej ta' l-eżerċti,"hekk li ma jħallilhom la għerq u lanqas fergħa. Imma għalikom li tibżgħu minn ismi titla' x-xemx tal-ġustizzja, bis-salvazzjoni fuq ġwenħajha; u intom toħorġu taqbżu qiskom għoġiela tal-mandra.

Salm Responsorjali Salm1, 1-2; 3; 4; 6

Hieni l-bniedem li jqiegħed fil-Mulej it-tama tiegħu

Hieni l-bniedem li ma jimxix fuq il-pariri tal-ħżiena,

li ma jiqafx fi triq il-ħatjin,

li ma joqgħodx fil-laqgħat taż-żeblieħa;

imma fil-liġi tal-Mulej hi l-għaxqa tiegħu,

lejl u nhar jaħseb fil-liġi tiegħu.

Hieni l-bniedem li jqiegħed fil-Mulej it-tama tiegħu

Hu bħal siġra mħawwla ħdejn nixxigħat ta' l-ilma

li tagħmel il-frott fi żmienha,

u l-weraq tagħha ma jidbielx;

hu jirnexxi f'kull ma jagħmel.

Hieni l-bniedem li jqiegħed fil-Mulej it-tama tiegħu

Mhux hekk il-ħżiena, mhux hekk;

iżda huma bħal tibna li jtajjarha r-riħ.

Għax triq it-tajbin il-Mulej jafha;

imma triq il-ħżiena tintemm fix-xejn.

Hieni l-bniedem li jqiegħed fil-Mulej it-tama tiegħu

L-Evanġelju Luqa 11, 5-13

F’dak iż-żmien Ġesù qalilhom: "Wieħed minnkom ikollu ħabib li jiġih f'nofs ta' lejl u jgħidlu, 'Ħabib, islifni tliet ħobżiet, għax ġie għandi wieħed ħabib tiegħi mill-vjaġġ u ma għandix x'nagħtih.' U l-ieħor iwieġbu minn ġewwa u jgħidlu, 'Iddejjaqnix; issa l-bieb magħluq, u wliedi qegħdin fis-sodda miegħi; ma nistax inqum nagħtik.' Ngħidilkom jien, li jekk ma jqumx jagħtih għax ħabib tiegħu, iqum u jagħtih kull ma jkollu bżonn minħabba l-wiċċ sfiq tiegħu. U jiena ngħidilkom: Itolbu u jingħatalkom, fittxu u ssibu, ħabbtu u jiftħulkom. Għax min jitlob, jaqla'; min ifittex, isib; u min iħabbat, jiftħulu. Min hu dak il-missier fostkom li, jekk ibnu jitolbu ħuta, minflok ħuta jagħtih serp? Inkella jekk jitolbu bajda jagħtih skorpjun? Mela jekk intom, nies ħżiena bħalkom, tafu tagħtu lil uliedkom ħwejjeġ tajba, kemm aktar il-Missier mis-smewwiet jagħti spirtu qaddis lil dawk li jitolbuhulu?"

L-Erbgħa 7 t’Ottubru

2009-10-07T02:32:00.000-07:00

L-Erbgħa 7 t’Ottubru Il-Madonna tar-Ruzarju

L-Ewwel Qari Ġona 4, 1-11

Iżda dan xejn li xejn m'għoġbu lil Ġona, u nkorla. U talab lill-Mulej u qal: "Jaħasra, Mulej, m'hux dan kien kliemi meta kont għadni f'pajjiżi? Kien għalhekk li jien għall-ewwel ħrabt lejn Tarsis, għax kont naf li int Alla ħanin u tagħder, tqil biex tinkorla, kollok tjieba u jisgħob bik għad-deni. U issa, Mulej, ħudli ħajti, nitolbok, għax għalija aħjar immut milli nibqa' ħaj?" U qal il-Mulej: "Dan sewwa għalik li tinkorla?" Mbagħad Ġona ħareġ mill-belt u qagħad in-naħa tal-lvant tal-belt; tella' għalih għarix hemmhekk, u qagħad taħtu, għad-dell, biex jara x'kien se jiġri mill-belt. U l-Mulej Alla ordna li titla' siġra tar-riġnu għal Ġona, biex ikollu d-dell fuq rasu u teħilsu mill-ħsara. Ġona feraħ wisq bis-siġra; imma kif sebaħ l-għada, Alla bagħat dudu li mess is-siġra u din nixfet. Ġara mbagħad li, kif telgħet ix-xemx, il-Mulej bagħat riħ jaħraq mil-lvant, ix-xemx qabdet tisreġ fuq ras Ġona, hekk li dan ħassu ħażin u xtaq li jmut, u qal: "Għalija aħjar immut milli nibqa' ħaj?" U qal Alla lil Ġona: "Dan sewwa għalik li tinkorla għas-siġra?" Iżda hu wieġeb: "Iva, sewwa li nkurlajt sal-mewt." Mbagħad qallu l-Mulej: "Inti ġietek ħasra mis-siġra tar-riġnu, li la tħabatt għaliha u lanqas kabbartha int, u li f'lejl wieħed ġiet u f'lejl wieħed marret. Mela jiena ma kellix tiġini ħasra minn Ninwè?, il-belt il-kbira fejn hemm aktar minn mija u għoxrin elf ruħ li ma jafux jagħżlu bejn il-lemin u x-xellug tagħhom, u fejn hemm ukoll ħafna bhejjem?"

Salm Responsorjali Salm 86:3-4, 5-6, 9-10

Int, Alla Sidi, ħanin u twajjeb.

Int Alla tiegħi, ħenn għalija, Sidi,

għax lilek ngħajjat il-ħin kollu.

Ferraħ ruħ il-qaddej tiegħek,

għax lejk, Sidi, jien nerfa' ruħi.

Int, Alla Sidi, ħanin u twajjeb.

Għax int, Sidi, twajjeb u taħfer,

kollok tjieba għal kull min isejjaħlek.

Agħti widen, Mulej, għat-talba tiegħi,

isma' l-leħen ta' l-ilfiq tiegħi.

Int, Alla Sidi, ħanin u twajjeb.

Il-ġnus kollha, li għamilt, jiġu jinxteħtu quddiemek,

u jsebbħu ismek, Sidi.

Għax kbir int, u għemejjel ta' l-għaġeb tagħmel;

int waħdek Alla!

Int, Alla Sidi, ħanin u twajjeb.

L-Evanġelju Luqa 11, 1-4

Darba kien qiegħed xi mkien jitlob. Kif spiċċa mit-talb, wieħed mid-dixxipli tiegħu qallu: "Mulej, għallimna nitolbu, bħalma Ġwanni wkoll għallem lid-dixxipli tiegħu." U qalilhom: "Meta titolbu, għidu, 'Missier, jitqaddes ismek, tiġi Saltnatek. Ħobżna ta' kuljum agħtina kuljum. U aħfrilna dnubietna, għax aħna wkoll naħfru lil kull min hu ħati għalina, u la ddaħħalniex fit-tiġrib.'"

It-Tlieta 6 t’Ottubru

2009-10-06T13:13:00.000-07:00

It-Tlieta 6 t’Ottubru It-Tlieta tas-27 ġimgħa ta’ matul is-sena

L-Ewwel Qari Ġona 3, 1-10

U l-kelma tal-Mulej għat-tieni darba waslet lil Ġona u qallu: "Qum, mur f'Ninwè, il-belt il-kbira, u xandrilha li ngħidlek jien." U Ġona qam u mar f'Ninwè kif qallu l-Mulej. Issa Ninwè kienet belt kbira għall-aħħar, trid tlitt ijiem biex timxiha. Ġona, kif daħal il-belt, beda ġurnata mixi, ixandar u jgħid: "Erbgħin jum ieħor, u Ninwè ssir ħerba?" In-nies ta' Ninwè emmnu f'Alla, nedew sawma u libsu x-xkejjer, mill-kbir saż-żgħir. L-aħbar waslet għand is-sultan ta' Ninwè, u qam minn fuq it-tron tiegħu, neħħa minn fuqu l-mantell tiegħu, nkesa bi xkora, u ntasab fuq l-irmied. U ħarġu jxandru u jgħidu f'Ninwè: "B'digriet tas-sultan u tal-kbarat tiegħu: La nies, la annimali, la bhejjem u lanqas merħliet, ħadd m'għandu jduq xejn, u la jirgħu u lanqas jixorbu ilma. U jinksew bi xkejjer, kemm il-bnedmin u kemm l-annimali jgħajjtu b'qawwa lejn Alla, u kull wieħed jerġa' lura minn triqtu l-ħażina u mill-ħsara li għamel b'idejh. Min jaf jekk Alla jibdilux u jisgħobx bih, u jdur mill-korla mixgħula tiegħu, u aħna ma nintilfux?" U Alla ra x'għamlu, kif reġgħu lura minn triqthom il-ħażina. U Alla raġa' bdielu mid-deni li qal li kien se jagħmlilhom, u ma għamlux.

Salm Responsorjali Salm 130, 1b-2; 3-4ab; 7-8

Jekk tal-ħtijiet int tagħti kas, Mulej, Sidi, min jista' jżomm sħiħ?

Minn qiegħ l-art insejjaħlek, Mulej:

isma', Sidi, il-leħen tiegħi!

Ħa jkunu widnejk miftuħa,

jiena u nitolbok bil-ħniena.

Jekk tal-ħtijiet int tagħti kas, Mulej, min jista' jżomm sħiħ?

Jekk tal-ħtijiet int tagħti kas, Mulej,

Sidi, min jista' jżomm sħiħ?

Imma għandek hemm il-maħfra, biex

hekk inqimuk fil-biża' tiegħek.

Jekk tal-ħtijiet int tagħti kas, Mulej, min jista' jżomm sħiħ?

Jistenna Iżrael lill-Mulej!

Għax għand il-Mulej hemm it-tjieba,

u l-fidwa għandu bil-kotra.

Hu li jifdi lil Iżrael minn ħtijietu kollha.

Jekk tal-ħtijiet int tagħti kas, Mulej, min jista' jżomm sħiħ?

L-Evanġelju Luqa 10, 38-42

Huma u sejrin, daħal f'raħal, u laqgħetu għandha waħda mara jisimha Marta. Din kellha oħtha, jisimha Marija, li niżlet bilqiegħda f'riġlejn il-Mulej tisimgħu x'kien qiegħed jgħid. Iżda Marta kienet moħħha fuq il-ħafna xogħol tad-dar. Mbagħad resqet u qaltlu: "Mulej, m'intix tara kif oħti ħalliet ix-xogħol kollu fuqi biss? Mela għidilha taqbad tagħmel xi ħaġa miegħi?" Qabeż il-Mulej u qalilha: "Marta Marta! Inti taħseb wisq u tinkwieta fuq ħafna ħwejjeġ; imma waħda hi meħtieġa. U Marija għażlet l-aħjar sehem, li ma jitteħdilhiex."

It-Tnejn 5 t’Ottubru

2009-10-05T14:21:00.000-07:00

It-Tnejn 5 t’Ottubru It-Tnejn tas-sebgħa u għoxrin ġimgħa ta’ matul is-sena

L-Ewwel Qari Ġona 1, 1-2,2; 11

Il-kelma tal-Mulej waslet lil Ġona bin Amittaj, u qallu: "Qum, mur Ninwè, il-belt il-kbira, u xandrilha li ħżunithom telgħet quddiemi." Imma Ġona qam biex jaħrab lejn Tarsis minn quddiem il-Mulej. Niżel Ġaffa, fejn inzerta ġifen sejjer lejn Tarsis, ħallas il-passaġġ, u telaq fuqu biex imur magħhom f'Tarsis, 'il bogħod mill-Mulej. Iżda l-Mulej bagħat riefnu fuq il-baħar, u qamet taqliba kbira, hekk li l-ġifen kien għoddu nqasam. Il-baħrin twerwru, u kull wieħed minnhom beda jgħajjat lill-alla tiegħu; u waddbu l-baħar il-merkanzija li kien hemm fuq il-ġifen, biex iħaffu minn fuqhom. Iżda Ġona niżel isfelnett tal-ġifen, mtedd u raqad fil-fond. Mbagħad resaq fuqu l-kaptan u qallu: "Int kif int rieqed? Qum, u sejjaħ lil Alla tiegħek! Għandu mnejn Alla jiftakar fina u ma nintilfux?" Mbagħad bdew jgħidu wieħed lil ieħor: "Ejjew nitfgħu x-xorti, ħa nkunu nafu ta' min hi l-ħtija li waqa' fuqna dan l-għawġ kollu." Tefgħu x-xorti, u x-xorti waqgħet fuq Ġona. Mbagħad qalulu: "Issa għidilna: ħtija ta' min ġie fuqna dan il-għawġ? X'inhu xogħlok, minn fejn int ġej, liema hu pajjiżek, u minn liema poplu int?" "Jien Għebrew?" qalilhom,"u nqim lill-Mulej, Alla tas-sema, li għamel il-baħar u l-art." Dawk l-irġiel beżgħu biża' kbir, u qalulu: "Dan għax għamiltu?" Għax billi hu qalilhom kollox, saru jafu li kien ħarab minn quddiem il-Mulej. Mbagħad qalulu: "X'se nagħmlu bik, biex il-baħar jikkwitalna?" Għax il-baħar baqa' jżid. "Aqbduni u ixħtuni l-baħar?" qalilhom,"u l-baħar jikkwitalkom. Għax naf li din it-tempesta kollha waqgħet fuqkom ħtija tiegħi." In-nies armaw jaqdfu biex jerġgħu jaqbdu l-art, iżda ma seħħilhomx, għax it-taqlib tal-baħar baqa' jżid kontrihom. Għalhekk sejjħu l-Mulej u qalu: "Jaħasra, Mulej, nitolbuk li ma tħalliniex nintilfu ħtija tal-ħajja ta' dan il-bniedem, u twaħħalniex ħatja ta' demm bla ħtija, għax kont int, Mulej, li għamilt kif għoġbok." U qabdu 'l Ġona u xeħtuh il-baħar, u l-baħar raqqad il-qilla tiegħu. U l-irġiel qabadhom biża' kbira mill-Mulej, u offrew sagrifiċċji lill-Mulej u għamlu wegħdiet. U l-Mulej qabbad ħuta kbira tibla' 'l Ġona, u Ġona baqa' tlitt ijiem u tliet iljieli f'żaqq il-ħuta. U talab Ġona lill-Mulej, Alla tiegħu, minn żaqq il-ħuta. U l-Mulej kellem lill-ħuta, u din xeħtet lil Ġona fuq l-art.

Salm Responsorjali Ġona 2, 3; 4; 5; 8